डुलकी येताच रेल्वेतून कोसळल्याने युपीतील तरुणाचा चाळीसगावात मृत्यू

चाळीसगाव : मित्रांसोबत मुंबईला कामासाठी जाणार्‍या युपीतील तरूणाला डुलकी लागल्याने दरवाजातून पडून रेल्वेच्या चाकाखाली आल्याने त्याचा दुदैवी मृत्यू झाला. ही घटना चाळीसगाव रेल्वे स्थानकावर रविवारी मध्यरात्री घडली आहे. याप्रकरणी पोलिसात अक्समात मृत्यूची नोंद करण्यात आली आहे. रमेश रमग्य पासवान (21, गोरखपूर, उत्तरप्रदेश) असे मयताचे नाव आहे.

डुलकी पडली महागात
रमेश हा युवक आपल्या मित्रांसोबत गोरखपूर-मुंबई रेल्वेने (क्र. 20104) मुंबई येथे कामासाठी जात असताना पासवान हा रेल्वेच्या दरवाजात बसलेला होता. त्याला अचानक झोपेची डुलकी आली आणि तो रेल्वेच्या चाकाखाली आल्याने जागीच मरण पावला. ही धक्कादायक घटना चाळीसगाव रेल्वे स्थानकावर रविवारी मध्यरात्री 12.35 वाजताच्या सुमारास घडली. येथून जवळ असलेल्या खडकी खांब नंबर- 321/24-22 दरम्यान ही घटना घडली. या घटनेची माहिती मिळताच रेल्वे पोलिसांसह शहर पोलिसांनी घटनास्थळी धाव घेऊन पाहणी करत पंचनामा केला. दरम्यान वैद्यकीय अधिकारी यांच्या खबरीवरून याप्रकरणी चाळीसगाव शहर पोलिस स्थानकात अकस्मात मृत्यूची नोंद करण्यात आली. पोलिस निरीक्षक के. के.पाटील यांच्या मार्गदर्शनाखाली तपास किशोर सोनवणे हे करीत आहे.