डॉ.पायल तडवी आत्महत्या प्रकरण: तीन डॉक्टरांचे निलंबन !

मुंबई: रॅगिंगला कंटाळून आत्महत्या करणाऱ्या डॉ.पायल तडवीला आत्महत्येस प्रवृत्त करणाऱ्या नायर रुग्णालयातील तीन डॉक्टरांवर कारवाईचे करण्यात आली आहे. महाराष्ट्र असोसिएशन ऑफ रेसिडंट डॉक्टर्स अर्थात ‘मार्ड’ने या तिघींनाही आज सोमवारी निलंबित केले. डॉ.पायल तडवी यांच्या आत्महत्येमुळे देशभरात पुन्हा एकदा रॅगिंगचा मुद्दा पुढे आला आहे.

संबंधित विभागाच्या प्रमुखांनाही निलंबित करण्यात यावे, अशी मागणी ‘मार्ड’ने केली आहे. पायल तडवीने वरिष्ठ सहकाऱ्यांकडून होत असलेल्या त्रासाबद्दल तोंडी व लेखी तक्रार करूनही कोणतीच कारवाई करण्यात आली नाही आणि एका उमद्या डॉक्टरचा जीव गेल्याचे ‘मार्ड’चे म्हणणे आहे. पायलने २२ मे रोजी आत्महत्या केली होती. पायलच्या आत्महत्येप्रकरणी आग्रीपाडा पोलीस ठाण्यात २३ मे रोजी डॉ. हेमा आहुजा, भक्ती मेहर आणि अंकिता खंडेलवाल या तिघींविरुद्ध गुन्हा दाखल करण्यात आला आहे. आत्महत्येस प्रवृत्त करणे, रॅगिंग व अट्रॉसिटी कायद्याखाली हा गुन्हा नोंदवण्यात आला आहे. डॉक्टरांचा एक व्हॉट्सअ‍ॅप ग्रुप आहे आणि त्या ग्रुपवर या तिन्ही डॉक्टर पायलला तिच्या जातीवरून हिणवायचे, असा आरोप पायलच्या कुटुंबीयांनी केला आहे.