डॉ. बाबासाहेब आंबेडकरांमुळेच आज पंतप्रधान : नरेंद्र मोदी

बिजापूर, छत्तीसगड : ‘एका गरीब आईचा मुलगा. अतिशय मागास समाजातून आलेला आणि तुमच्यापैकीच एक असलेला आज देशाचा पंतप्रधान आहे तो, फक्त डॉ. बाबासाहेबांमुळेच’, असे पंतप्रधान नरेंद्र मोदी यांनी स्पष्ट केेले. ’आयुष्यमान भारत’ या आरोग्य योजनेचे उद्घाटन करत पंतप्रधान नरेंद्र मोदींनी दलित समाजाची नाराजी दूर करण्याचा प्रयत्न केला. भारतरत्न डॉ. बाबासाहेब आंबेडकरांमुळेच मी पंतप्रधान होऊ शकलो, असे मोदी म्हणाले. छत्तीसगडमधील बिजापूर येथे आयोजित केलेल्या जाहीर सभेत मोदी बोलत होते.

यावेळी मोदींनी बिजापूरच्या मागासलेपणाला आधीचे सरकार जबाबदार असल्याचा आरोप केला. यावेळी ‘ग्राम स्वराज्य’ अभियानाचेही उद्घाटन पंतप्रधानांनी केले. दलित, वंचित आणि शोषित महिलांना बळ देण्यासाठी हे अभियान सुरू केल्याचे मोदी यांनी स्पष्ट केले. हे अभियान 5 मेपर्यंत राबवण्यात येणार आहे. आयुष्यमान भारत योजनेचा पहिला टप्पा सुरू करण्यात आला आहे. यानुसार प्राथमिक आरोग्य यंत्रणेत मोठे बदल करण्याचा केंद्र सरकारचा महत्त्वकांक्षी प्रयत्न आहे. प्रत्येक मोठ्या पंचायतींच्या ठिकाणी म्हणजे किमान दीड लाख ठिकाणांवरील आरोग्य उपकेंद्र आणि प्राथमिक आरोग्य केंद्रांचे रूप पालटण्यात येणार आहे.

अ‍ॅट्रॉसिटी कायद्यात सुप्रीम कोर्टाने केलेल्या बदलानंतर केंद्रातील भाजप सरकारविरोधात दलितांमध्ये तीव्र नाराजी आहे. सुप्रीम कोर्ट आणि केंद्र सरकारविरोधात दलित संघटनांनी 2 एप्रिलला भारत बंद पुकारला होता. या बंदला अनेक ठिकाणी हिंसक वळण लागले. यामुळे डॉ. बाबासाहेब आंबेडकरांच्या 127 व्या जयंतीनिमित्त ‘आयुष्यमान भारत योजने’चे उद्घाटन करत मोदींनी नाराज दलित समाजात विश्‍वास निर्माण करण्याचा प्रयत्न केला. तसेच विरोधकांच्या आरोपांनाही प्रत्युत्तर दिले. ‘14 एप्रिल हा दिवस देशातील सव्वाशे कोटी जनतेसाठी अतिशय महत्त्वाचा आहे. भारतरत्न डॉ. बाबासाहेब आंबेडकरांची जयंती आहे. या निमित्ताने जनतेचा आशीर्वाद घेण्याचे भाग्य लाभले’, असे नरेंद्र मोदी म्हणाले.