डोंबिवलीत शिक्षिकेची हत्या

डोंबिवली । आईला उद्देशून अपशब्द वापरल्यामुळे रोहित नावाच्या विद्यार्थ्याने मनीषा खानोलकर या शिक्षिकेची हत्या केल्याचे उघडकीस आले आहे. डोंबिवलीत 65 वर्षीय ट्युशन टीचरच्या हत्येचे गूढ पोलिसांनी उकलले. डोंबिवलीतील कोपरगावात असलेल्या ओम परशुराम अपार्टमेंटमध्ये मनीषा यांचा मृतदेह रक्ताच्या थारोळ्यात सापडला होता. विष्णूनगर पोलीस ठाण्यात याप्रकरणी हत्येचा गुन्हा नोंदवण्यात आला होता. पोलिसांनी तपास करून रोहित तायडे या तरुणाला अटक केली.

आपल्या आईला शिवीगाळ केल्याने संतापलेल्या रोहितने हत्या केल्याचे तपासात उघड झाले. रोहितने ट्युशन टीचरच्या घरात घुसून त्यांच्या डोक्यात कुकरने वार करून त्यांची हत्या केली. मनीषा खानोलकर गेल्या 17 ते 18 वर्षांपासून एकट्याच राहत होत्या. त्या शालेय विद्यार्थ्यांचे ट्युशन्स घायच्या. रविवारी संध्याकाळी चार वाजताच्या सुमारास ट्युशनसाठी आलेल्या विद्यार्थ्यांनी त्यांचा दरवाजा ठोठावला. मात्र, त्यांनी दरवाजा उघडला नाही. त्यामुळे मुलांनी खिडकीतून डोकावून पाहिलं असता त्यांना मनीषा निपचित पडलेल्या दिसल्या. ही बाब विद्यार्थ्यांनी सोसायटीच्या निदर्शनास आणून दिली असता त्यांनी तत्काळ दरवाजा तोडला.