..तर गाळेधारकांवर जूनपासून दीडपट दंड

अनधिकृत भोगवटाधारक,पोस्टाने बजावणार अंतिम आदेश

जळगाव:मनपा मालकीच्या मुदत संपलेल्या 18 व्यापारी संकुलातील गाळेधारकांना कलम 81 ब आणि क नुसार नोटीस बजावण्यात आल्या आहेत. तसेच 30 जूनपर्यंत बिले भरण्यासाठी 15 दिवसाची मुदत दिली आहे. गाळेधारकांनी संपूर्ण थकबाकी न भरल्यास 30 जून नंतरच्या बिलांपासून दीडपट दंड आकारणी करण्यात येणार असल्याचे आदेश गाळेधारकांना बजावण्यात येणार असल्याची माहिती उपायुक्त उत्कर्ष गुठे यांनी दिली.

गाळेधारक अनधिकृत कब्जेदार
मनपा मालकीच्या 18 व्यापारी संकुलातील 2387 गाळ्यांची मुदत 2012 मध्ये संपुष्टात आली आहे. तेव्हापासून गाळेधारक थकबाकीदार आहेत.तसेच मनपा अधिनियम कलम 81 ब च्या आदेशानंतर सुध्दा ताब्यात ठेवून अनधिकृतरित्या वापर सुरु आहे.त्यामुळे गाळेधारक अनधिकृत कब्जेदार असल्याचे आदेशात म्हटले आहे. गाळेधारक अनधिकृत कब्जेदार असल्यामुळे मनपा अधिनियम शासनाच्या आदेशानुसार मुदतीनंतर अनधिकृतरित्या ताब्याच्या कालावधीतील नुकसान भरपाईची रक्कम भरण्यासाठी कलम 81 क नुसार नोटीस बजावली आहे.

गाळेधारकांना 11 आक्टोबरपर्यंत अल्टीमेटम
मनपा प्रशासनाने कलम 81 क नुसार बजावलेल्या नोटीस नुसार निश्‍चित करण्यात आलेली नुकसान भरपाईची रक्कम दि.11 आक्टोबरपर्यंत भरणा करण्यासाठी मुदत दिलेली आहे.दिलेल्या मुदतीत भरणा न केल्यास कठोर कारवाई करण्याचा प्रशासनाने इशारा देखील दिला आहे.

50 गाळेधारकांच्या हरकती फेटळल्या
मुदत संपलेल्या 18 व्यापारी संकुलांपैकी महात्मा फुले,सेन्ट्रल फुले,जुने बीजेसह पाच व्यापारी संकुलातील गाळेधारकांना कलम 81 क नुसार पोस्टाद्वारे नोटीस पाठविण्यात आल्या आहेत. तसेच उर्वरित संकुलातील गाळेधारकांना देखील टप्प्याटप्प्याने नोटीस पाठविण्यात येत आहेत.दरम्यान,50 गाळेधारकांनी हरकती घेतल्या होत्या.त्या हरकती मनपा प्रशासनाने फेटाळल्या.

रेडीरेकनरनुसार दंड आकारणी
गाळेधरकांना रेडीरेकनरनुसार आकारणी करुन त्या रकमेवर विलंब व्याज ,मालमत्ता करासह दि.30 जून 2019 पर्यंत बिले दिली आहेत.गाळेधारकांनी थकीत रकमेचा भरणा न केल्यास 30 जूनपासून प्रचलित रेडीरेकनर दराच्या दीडपट दंडाची आकारणी केली जाणार आहे.