…तर तो शिवरायांचा अपमान होईल; सेनेचा उदयनराजेंना टोला

मुंबई: छत्रपती शिवाजी महाराजांचे १३ वे वंशज उदयनराजे भोसले यांनी भाजपात प्रवेश केला आहे. दरम्यान त्यांच्या प्रवेशानंतर शिवसेनेने उदयनराजेंचा चिमटा काढला आहे. उदयनराजे हे शिवरायांचे १३ वे वंशज आहेत म्हणून त्यांना समाजात मान आहे. त्यामुळे मराठा समाजाची मते पदरात पडतील असे भाजपचे गणित आहे, पण शिवराय हे फक्त एका जातीचे नव्हेत, तर सर्व जाती-धर्माच्या लोकांचे दैवत आहे. त्यामुळे शिवरायांचे वंशज एका जातीच्या राजकारणासाठी वापरले जात असतील तर तो शिवरायांचा अपमान ठरेल,’ अशी टीका शिवसेनेच्या मुखपत्रातून करण्यात आली आहे.

उदयनराजे भोसले यांनी राष्ट्रवादीला रामराम करत भाजपमध्ये प्रवेश केला आहे. त्यापार्श्वभूमीवर शिवसेनेचे मुखपत्र असलेल्या दैनिक ‘सामना’च्या अग्रलेखातून उद्धव ठाकरे यांनी भाष्य केले आहे. ‘शिस्त, तत्त्व, संस्कार, नीतिमत्ता आणि साधनशुचिता या पंचसूत्रीवर भाजपचा डोलारा उभा आहे. भाजपचे अध्यक्ष अमित शहा किंवा पंतप्रधान नरेंद्र मोदी व्यासपीठावर असताना शिट्या मारणे, कॉलर उडवणे, इतर नाट्यछटा करणे हे असले प्रकार भाजपच्या शिस्तीत बसत नाहीत याची कल्पना मुख्यमंत्री देवेंद्र फडणवीस, चंद्रकांत पाटील यांनी सातारच्या राजांना एव्हाना दिली असेल. येथे हायकमांड आहे व ते दिल्लीत आहे. थोरल्या छत्रपतींनी दिल्लीतील तेव्हाच्या हायकमांडला जुमानले नव्हते. उदयनराजेंनी दिल्लीत जाऊन हायकमांडच्या आशीर्वादाने भाजपचा रस्ता पकडला व भाजपात प्रवेश घेताना त्यांनी कॉलरही उडवली नाही. शिस्तीचे वळण राजांना लागत आहे, अभिनंदन,’ असा टोला उद्धव यांनी उदयनराजेंना लगावला आहे.