‘तहसीलदार हिरोईनच’; बबनराव लोणीकरांचे वादग्रस्त वक्तव्य !

जालना : भाजप नेते आणि माजी मंत्री बबनराव लोणीकर वादाच्या भोवऱ्यात सापडले आहे. तहसीलदार यांच्याबद्दल त्यांनी वादग्रस्त विधान केले आहे. शेतकऱ्यांच्या मोर्चाला गर्दी जमवण्यासाठी कोणाला आणायचे तुम्ही सांगा? फडणवीस, चंद्रकांत पाटील यांना आणायचे का? कोणीच नाही आले तर हिरोईन आणू, तहसीलदार या हिरोईनच आहेत असे वक्तव्य बबनराव लोणीकर यांनी केले आहे. जालना जिल्ह्यातल्या परतूर गावातील एका जाहीर कार्यक्रमात बबनराव लोणीकर बोलत होते. लोणीकरांच्या भाषणाची ऑडिओ क्लिप समोर आली आहे. यावरून आता विरोधी पक्षाची लोणीकर यांच्यावर आरोप होत आहे. हा विनयभंगाचा प्रकार असून लोणीकर यांच्यावर गुन्हा दाखल करण्याची मागणी होऊ लागली आहे.

सरकारकडून 25 हजार रुपये अनुदान पाहिजे असेल तर मराठवाड्यातला सगळ्यात मोठा मोर्चा परतूरला करायचा का तुम्ही ठरवा. सगळ्या सरपंचांनी आपाआपल्या गावातून गाड्या आणल्या पाहिजेत. जिल्हा परिषद सदस्य, पंचायत समिती सदस्य सगळ्यांनी ताकद लावली तर महाराष्ट्रातला सगळ्यात मोठा मोर्चा येथे होऊ शकतो. आणि अधिवेशनाच्या आधी जर मोर्चा झाला, तर 25 हजार लोक आणेल, 50 हजार लोक आणेल, तुम्ही सांगा देवेंद्र फडणवीस यांना आणू, तुम्ही सांगा चंद्रकांतदादा पाटलांना आणू. तुम्ही सांगा सुधीर भाऊंना आणू. कुणाला आणायचं तुम्हाला वाटलं तर मग एखादी हिरोईन आणायची तर हिरोईन आणू आणि नाही जर कोणी भेटलं तर तहसीलदार मॅडम हिरोईन आहेतच, त्या निवेदन घ्यायला येतील, असं बबनराव लोणीकरांनी म्हटलं.