तांबापुरातील जुगार अड्ड्यावर पोलिसांचा छापा

जळगाव। शहरातील स्थानिक गुन्हे शाखा पथकाने शनिवारी दुपारी 1.30 वाजता तांबापुरा-हुडको भागात जुगाराच्या अड्ड्यावर छापा मारला. यावेळी पाच जण जुगार खेळतांना मिळून आले असून त्यांना पथकाने ताब्यात घेतले आहे. यासोबतच पथकाने त्याच्याजवळून 2 लाख 10 हजार 350 रुपयांचा मुद्देमाल हस्तगत केला आहे. तर पाचही जणांना पूढील कारवाईसाठी पथकाने एमआयडीसी पोलिसांच्या ताब्यात दिले आहे.

स्थानिक गुन्हे शाखा विभागाचे वरीष्ठ पोलिस निरीक्षक राजेशसिंह चंदेल यांना तांबापुरा-हुडको भागात पत्ता-जुगाराचा खेळ खेळत असल्याची माहिती मिळाली होती. त्या माहितीच्या आधारावर पोनि. चंदेल यांच्या मार्गदर्शनाखाली पोलिस उपनिरीक्षक प्रकाश इंगळे, पोहेकॉ. रविंद्र घुगे, दिलीप येवले, अशोक चौधरी, सतिश होळणार, विनोद पाटील, दिनेश बडगुजर, रामकृष्ण पाटील, रविंद्र चौधरी, दत्तात्रय बडगुजर आदींच्या पथकाने शनिवारी दुपारी 1.30 वाजेच्या सुमारास ताबापुरा-हुडको भागातील जुगार अड्ड्यावर छापा मारला.

यांना घेतले पथकाने ताब्यात
यात अश्पाक शहा हारून शहा (रा.मेहरूण), याकुब नजिर पिंजारी (रा.पिरजादे वाडा, मेहरूण), अस्लम खान सलिम खान (रा.मेहरूण), विठ्ठल आत्माराम लहेकर (रा.जोशीवाडा, मेहरूण), इब्राहिम यासीन खाटील (रा.मच्छीमार्केट, तांबापूरा) हे पाच जण जुगार खेळतांना पथकाला मिळून आलेत. दरम्यान, झाडाझडती घेतली असता त्यांच्याकडून रोख रूपये, मोटारसायकल, मोबाईल व जुगाराचे साहित्य असे 2 लाख 10 हजार 350 रुपयांचा मुद्देमाल मिळून येवून तो पथकाने ताब्यात घेतले आहे.