तांबापुरा हाणामारीप्रकरणी दोघांना अटक

जळगाव। तांबापुरा भागातील मच्छी मार्केटजवळ मंगळवारी रात्री दहा वाजता दोन गटात झालेल्या हाणामारीप्रकरणी योगेश शेनफडू हटकर (गवळी) व भूषण शेनफडू हटकर (दोन्ही रा.गवळीवाडा, तांबापुरा जळगाव) या दोघांना बुधवारी पहाटे तीन वाजता अटक करण्यात आली. दरम्यान, त्यांना बुधवारी न्यायाधीश बी.डी.गोरे यांच्या न्यायालयात हजर केले असता त्यांना न्यायालयीन कोठडी सुनावली आहे.

दोन्ही गटाकडून दगडफेक; एमआयडीसी पोलिसात गुन्हा
मकसूद शेख सलीम खाटीक यांच्या बकरीला योगेश हटकर याच्या दुचाकीचा कट लागल्याच्या कारणावरुन हटकर व खाटीक या दोन गटात वाद होवून त्याचे रुपांतर दगडफेकीत झाले होते. यात मकसूद खाटीक, सलीम शेख बिसमिल्ला खाटीक, रईसाबी शेख सलीम खाटीक व शबाना शेख रहिम खाटीक आदी चार जण जखमी झाले होते. पोलिसांनी तत्काळ धाव घेवून वेळीच नियंत्रण मिळविल्याने मोठी घटना टळली.दरम्यान, दुसर्‍या गटाचे भूषण हटकर यांनीही पोलिसात तक्रार दिली आहे. त्याच्या फिर्यादीवरुन मकसूद खाटीक, सलीम शेख बिसमिल्ला खाटीक व रईस शेख सलीम खाटीक या तीन जणांविरुध्द अदखलपात्र गुन्ह्याची नोंद करण्यात आली आहे. हेडकॉन्स्टेबल सचिन मुंडे या गुन्ह्याचा तपास करीत आहेत. दुसर्‍या गुन्ह्याचा तपास उपनिरीक्षक रोहन खंडागळे करीत आहेत. या घटनेच्या पार्श्वभूमीवर पोलीस निरीक्षक सुनील कुराडे, सहायक निरीक्षक समाधान पाटील, उपनिरीक्षक रोहन खंडागळे, रामकृष्ण पाटील, बशीर तडवी, शरद भालेराव, अशरफ शेख, मनोज सुरवाडे, विजय पाटील, नेरकर यांनी बुधवारी सकाळीही या भागात भेट दिली. परिसरात बंदोबस्त लावण्यात आला आहे. तर हाणामारीप्रकरणी योगेश शेनफडू हटकर (गवळी) व भूषण शेनफडू हटकर या दोघांना पोलिसांनी अटक केली असून त्यांना बुधवारी न्यायाधीश बी.डी.गोरे यांच्या न्यायालयात हजर केले असता त्यांना न्यायालयीन कोठडी सुनावली आहे.