‘तालेरा’साठी वाढीव 39 कोटी खर्च

महापालिका रुग्णालयाचा होणार कायापालट

पिंपरी-चिंचवड : चिंचवड येथे महापालिकेचे तालेरा रुग्णालय आहे. रुग्णालयाची जुनी इमारत पाडून नवीन इमारत बांधण्यात येणार आहे. या कामासाठी सन 2017-18च्या अर्थसंकल्पात 26 कोटी रुपये खर्चास प्रशासकीय मान्यता देण्यात आली होती. या कामासाठी सल्लागार नेमून अर्थसंकल्प तयार करण्यात आला. त्याकरिता सुधारित प्रशासकीय मान्यता घेण्यात आली. मात्र, ही मान्यता घेताना अर्थसंकल्पातील सुधारित रक्कम 26 कोटींवरून थेट 71 कोटी 50 लाखांवर नेण्यात आली. त्यास सर्वसाधारण सभेत मंजुरी देण्यात आली.

कमी दराची निविदा मंजूर
महापालिकेच्या सर्वसाधारण सभेत तालेरा रुग्णालयाच्या इमारतीबाबत चर्चा झाली. विषय पत्रिकेवर असणारा विषय मंजूर करण्यात आला. तालेरा रुग्णालयाच्या नवीन इमारतीच्या कामासाठी ठेकेदारांकडून निविदा मागविण्यात आल्या. निविदा दर 39 कोटी 77 लाख रुपये निश्‍चित करण्यात आला. चार ठेकेदारांनी निविदा सादर केल्या. त्यापैकी एस. एस. साठे या ठेकेदाराने निविदादरापेक्षा 1.60 टक्के कमी म्हणजेच 39 कोटी 13 लाख रुपये दर सादर केला. त्यानुसार साठे यांच्यासमवेत करारनामा करण्यात येणार आहे.

रस्ता काँक्रीटीकरणासाठी 11 कोटींचा होणार खर्च
चिंचवडगावातील चापेकर चौक ते केशवनगर-काळेवाडी रस्त्याच्या काँक्रीटीकरणाचा दुसरा टप्पा विकसित करण्यात येणार आहे. या कामासाठी 11 ोटी 7 लाख रुपये खर्च होणार आहे. महापालिकेमार्फत चिंचवडगावातील चापेकर चौक ते केशवनगर-काळेवाडी रस्त्याच्या काँक्रीटीकरणाचा दुसरा टप्पा विकसित करण्यात येणार आहे. या रस्त्यासाठी 11 कोटी 90 लाख रुपये निविदा दर ठरविण्यात आला. निविदा प्रक्रियेमध्ये तीन ठेकेदारांनी निविदा सादर केल्या. त्यापैकी एकाने निविदा दरापेक्षा सात टक्के कमी दराने निविदा सादर केली. इतर ठेकेदारांपेक्षा त्यांचा दर कमी म्हणजेच 11 कोटी 7 लाख रुपये आहे. त्यामुळे त्यांची निविदा स्वीकृत करण्यास आयुक्त श्रावण हर्डीकर यांनी 2 फेब्रुवारी रोजी मान्यता दिली. त्यानुसार संबंधित ठेकेदारासमवेत करारनामा करण्याते येणार आहे.