तीन जिल्ह्यांमधील ‘मोस्ट वॉँटेड’ दुचाकीचोराला जळगाव एलसीबीने ठोकल्या बेड्या

धुळे व जळगाव, जिल्हयात चोरल्या 27 दुचाकी ; 9 दुचाकी हस्तगत

जळगाव : जिल्ह्यात दुचाकी चोरीच्या वाढत्या घटना लक्षात घेता पोलीस अधीक्षक डॉ.पंजाबराव उगले यांनी स्थानिक गुन्हे शाखेत मोटार व्हेईकल कक्षाची स्थापना केली आहे. जेथून वाहन चोरी गेले त्या पोलीस ठाण्यात गुन्हा दाखल झाल्यानंतर त्याचा समांतर तपास हे कक्षातूनही केला जात आहे. या कक्षाची स्थापना झाल्यानंतर जळगाव, धुळे व मालेगाव पोलिसांसाठी ‘मोस्ट वॉँटेड’ असलेल्या वैभव उर्फ दयावान देविदास बैरागी (26, रा.कुंझर, ता.चाळीसगाव ह.मु.कुंभारवाडा, पिंप्राळा, जळगाव) याला अट्टल दुचाकीचोराला स्थानिक गुन्हे शाखेच्या पथकाने अटक केली आहे. धुळे व जळगाव या दोन जिल्ह्यात तब्बल 27 दुचाकी चोरी केल्या असून त्याची कबूली दिली आहे. त्यापैकी 9 दुचाकी हस्तगत करण्यात आल्या असून या दुचाकी घेण्यासाठी पथके पुण्यासह इतर ठिकाणी रवाना झाली आहेत. या कामगिरीमुळे पोलीस अधीक्षक डॉ.पंजाबराव उगले यांनी स्थापन केलेल्या कक्षाचे हे फलित आहे.

धुळे जिल्ह्यातील 14 गुन्ह्यात फरार
दयावान हा धुळे जिल्ह्यातील 14 गुन्ह्यात मोस्ट वॉँटेड आहे. एका गुन्ह्यात त्याचा साथीदार पकडला गेला होता, मात्र हा तेव्हा निसटला होता. पोलिसांच्या रेकॉर्डवर असलेला मोस्ट वाँटेड दयावान हा नव्या दुचाकी चोरुन औरंगाबाद व अहमदनगर जिल्ह्यात अगदी कमी किमतीत 5 ते 10 हजारात या दुचाकीची विक्री करीत असल्याची माहिती या पथकाला मिळाली होती. पोलीस निरीक्षक बापू रोहोम यांनी विजयसिंग पाटील, शरद भालेराव, विनोद पाटील, अनिल देशमुख, रामकृष्ण पाटील, मुरलधीर बारी, राहूल पाटील व परेश महाजन यांचे पथक तयार केले आहे. त्यानुसार या पथकाने त्याला कुंझर, ता.चाळीसगाव येथून त्याच्या घरातूनच ताब्यात घेतले.

शहरातील 13 गुन्ह्यांचा सहभाग
जळगाव जिल्ह्यात जिल्हा पेठ, एरंडोल, जळगाव शहर, रामानंद नगरसह औरंगाबाद येथेही त्याने दुचाकी चोरी केल्या आहेत, तशी कबुली त्याने दिली. शहरातील 13 गुन्ह्यांमध्ये त्याचा थेट सहभाग निष्पन्न झाल्याची माहिती पोलिसांनी दिली. जिल्ह्यातील गुन्ह्यात फरार असताना तो पुण्यात असल्याची माहिती मिळाल्यानंतर रा.का.पाटील, विनोद पाटील, अरुण राजपूत, किशोर राठोड, रणजीत जाधव व अशोक पाटील यांचे एक पथक पुण्यात रवाना झाले होते. तर दुसरीकडे विजय पाटील, नरेंद्र वारुळे व दीपक पाटील यांचे पथक दयावान कोणाच्या संपर्कात आहे व तो सद्यस्थितीत कुठे आहे याची माहिती काढून बाहेर गेलेल्या पथकाला पुरवित होते. त्यामुळे वाँटेड वैभव पोलिसांच्या हाती लागला. साथीदाराचाही पथक शोध घेत आहे.

हिरो कंपनीच्याच चोरतो दुचाकी
दयावान हा फक्त ‘हिरो’ कंपनीच्याच दुचाकी चोरतो. एकाच कंपनीच्या व जास्तीत जास्त वर्ष, दोन वर्षापूर्वी घेतलेल्याच दुचाकीच चोरी करायचा. या दुचाकींना बनावट चावी लवकर लागते, जास्त कष्ट घेण्याची गरज नसते, म्हणून याच कंपनीच्या दुचाकीला त्याची पसंती असायची. बाहेर जिल्ह्यात दुचाकी विक्री करताना 5 ते 10 हजार रुपये घेऊन कागदपत्रे नंतर आणून देतो अशी बतावणी तो करीत असे. एकदाची दुचाकी विकली की पुन्हा त्यांना तोंड दाखवत नसे. सर्वच दुचाकींना बनावट क्रमांक टाकून त्याची विक्री तो करीत असल्याची माहिती चौकशीत त्याने पोलिसांना दिली आहे.