नितीश कुमार तुरुंगाच्या भीतीने भाजपात : लालूप्रसाद

भागलपूर : सृजन घोटाळ्याची कुणकुण दिल्लीत भाजपला लागली होती आणि त्यांनी अलिखित धमकीवजा संदेश नितीश कुमार यांना दिला होता. या घोटाळ्याप्रकरणी तुरुंगात जावे लागेल, याच भीतीने नितीश कुमार भाजपला शरण गेले, असा दावा लालूप्रसाद यांनी भागलपूरमधील रॅलीत केला. नितीश कुमार यांना खुर्चीचा मोह सूटत नाही. मुख्यमंत्रिपदाच्या खुर्चीवरच त्यांना प्राण सोडायचे आहेत, अशी घणाघाती टीका त्यांनी केली.

आमच्याविरोधात सीबीआयचा वापर
सृजन घोटाळ्याला नितीश कुमार आणि उपमुख्यमंत्री सुशील मोदी जबाबदार आहेत. आज नाही तर उद्या तेजस्वी यादव मुख्यमंत्रिपदी विराजमान होतील. नितीश कुमार यांच्या मर्जीने नव्हे तर गरीब, दलित आणि मागास वर्गातील जनतेच्या पाठिंब्याने तेजस्वी मुख्यमंत्रिपदाच्या खुर्चीवर विराजमान होतील. 20 वर्षांपासून खटले लढण्याची मला सवय झाली आहे. मी घाबरलो नाही म्हणून हे लोक माझ्या मुलांच्या मागे लागले आहेत. आमच्याविरोधात सीबीआयचा वापर केला जातोय, असा आरोपही लालूंनी केला.

दुर्जनांचे विसर्जन करणारच
तेजस्वी यादव यांनीही नितीश कुमार यांच्यावर निशाणा साधला. सृजन घोटाळ्यातील सत्य बाहेर आणण्याचा निर्धार केला आहे. सृजनमधील दुर्जनांचे विसर्जन केल्याशिवाय गप्प बसणार नाही. नितीश कुमार, सुशील मोदी आणि गिरिराज सिंहसारख्या घोटाळेबाज लोकांचे विसर्जन करण्यासाठी आलो आहोत, असे तेजस्वी म्हणाले.