तृप्ती देसाईविरोधात अ‍ॅट्रोसिटीचा गुन्हा
हिंजवडी : ‘भूमाता ब्रिगेड’च्या नेत्या तृप्ती देसाई आणि त्यांच्या पतीविरोधात हिंजवडी पोलिस ठाण्यात अ‍ॅट्रॉसिटी कायद्यान्वये गुन्हा दाखल करण्यात आला आहे. एका दलित व्यक्तीला मारहाण करून त्याच्याकडून पैसे उकळल्याचा आरोप तृप्ती देसाई आणि त्यांच्या पतीवर करण्यात आला. दरम्यान, पोलिसांनी तृप्ती आणि प्रशांत देसाई यांच्याविरोधात अ‍ॅट्रॉसिटी, मारहाण करणे, धमकी देणे असे गुन्हे दाखल करण्यात आले आहेत.
लाकडी दांडके, रॉडने मारहाण
27 जून 2017 रोजी सकाळी बालेवाडी येथील व्हीनस ग्रॅनाईडजवळ तृप्ती देसाई, प्रशांत देसाई, सतीश देसाई, कांतीलाल गवारे आणि इतर दोघांनी तक्रारदार विजय मकासरे यांनी मारहाण केली. लाकडी दांडक्याने आणि लोखंडी रॉडने मारहाण केल्याची माहिती मकासरे यांनी पोलिसांना दिली आहे. प्रशांत देसाई यांनी गळ्यातील सव्वा तोळ्याची सोन्याची चैन आणि 27 हजार रुपये काढून घेतले असल्याचा आरोपही मकासरे यांनी केला. तसेच तृप्ती देसाई यांनी आमच्याविरोधात पोलिसात गेलास तर तुझ्यावर खोटे गुन्हे दाखल करेन, अशी धमकी देत जातीवाचक शब्दांचा वापर केला. याप्रकरणी हिंजवडी पोलिस ठाण्यात तृप्ती देसाई आणि प्रशांत देसाई यांच्याविरोधात अ‍ॅट्रॉसिटी, रस्ता अडवणे, मारहाण करणे, धमकी देणे असे गुन्हे दाखल करण्यात आले आहे.