‘ते’ कर्मचारी येणार का पालिका सेवेत?
‘पीएमपीएमएल’च्या 178 जणांची तुकाराम मुंढे यांनी केली होती बदली
महापौर, आमदार, नगरसेवकांचे उंबरठे झिजविण्यास सुरूवात
पिंपरी-चिंचवड : पुणे परिवहन महानगर (पीएमपीएमएल)च्या 178 कर्मचार्‍यांना पुन्हा पिंपरी-चिंचवड महापालिका सेवेत घेण्याच्या हालचाली सुरू झाल्या आहेत. या कर्मचार्‍यांनी महापौर, आमदार, नगरसेवकांचे उंबरे झिजवण्यास सुरूवात केली आहे. पीएमपीचे तत्कालीन सीएमडी तुकाराम मुंढे यांची बदली झाली आहे. त्यामुळे सत्ताधार्‍यांनी पीएमपीएमलच्या बैठकीत या कर्मचार्‍यांना पालिकेत रुजू करुन घेण्याच्या सूचना केल्या. त्यानुसार पालिकेत रुजू करुन घेण्याच्या हालाचालींना वेग आला आहे. शनिवारी काही कर्मचार्‍यांनी महापालिकेतील प्रशासन विभागाच्या सहाय्यक आयुक्तांचीही भेट घेतली.
पीएमपीएमएलकडे वर्ग करण्याचे पत्र
पूर्वीच्या पिंपरी-चिंचवड महापालिका परिवहनकडील (पीसीएमटी) अतिरिक्त ठरणारे कर्मचारी तात्पुरत्या स्वरुपात महापालिकेच्या विविध विभागांमध्ये पीसीएमटीकडून वर्ग करण्यात आले होते. या कर्मचार्‍यांची पुणे महानगर परिवहन महामंडळ (पीएमपीएमएल)ला नितांत गरज असल्याने पीएमपीएमएलकडे वर्ग करण्यात यावे, असे पत्र पीएमपीएमएलचे तत्कालीन अध्यक्ष तुकाराम मुंढे यांनी पिंपरी महापालिकेला दिले होते.
कार्यमुक्त होवूनही रुजू नाही
तत्कालीन पालिका आयुक्तांनी या कर्मचार्‍यांना तात्काळ कार्यमुक्त केले होते. त्यानंतरही काही कर्मचारी पीएमपीएमएलमध्ये रुजू झाले नव्हते. मुंढे यांनी पीएमपीएमएलमध्ये रुजू न झाल्यास कामावरुन कमी करण्याचा इशारा देताच कर्मचारी रुजू झाले होते. तुकाराम मुंढे यांची नाशिक महापालिकेत आयुक्त म्हणून बदली झाल्यानंतर त्यांच्या जागी नयना गुंडे संचालक म्हणून आल्या आहेत.
प्रालिका प्रशासन विचाराधीन
पीएमपीएमएलमध्ये रुजू झालेल्या या 178 कर्मचार्‍यांनी पिंपरी-चिंचवड महापालिका सेवेत वर्ग करुन घेण्यासाठी आमदार, महापौर, नगरसेवकांकडे फिल्डिंग लावली आहे. त्यानुसार पालिका प्रशासनातही हालचाली सुरु झाल्या आहेत. या कर्मचार्‍यांना पालिकेत कायमस्वरुपी रुजू करुन घ्यायचे की तात्पुरत्या स्वरुपात याचा पालिका प्रशासन विचार करत असून लवकरच या कर्मचार्‍यांना पालिकेत रुजू करुन घेतले जाण्याची शक्यता आहे.