ते दोघे कर्मचारी कायद्याच्या कचाट्यात

उल्हासनगर । तब्बल 30 कोटी रुपये किमतीच्या भूखंडाची सनद बोगस असल्याचे समोर आल्यानंतर,गुन्हा नोंदवताना उपविभागीय अधिकार्‍यांनी डावललेल्या दोघा सरकारी कर्मचार्‍यांवरही आर्थिक गुन्हे शाखेने कायद्याच्या कचाट्यात खेचले आहे. या प्रकरणात उपविभागीय अधिकार्‍यांनी केवळ सात भूमाफीयांविरोधात फसवणुकीचा गुन्हा दाखल करून सरकारी कर्मचार्‍यांना पाठीशी घातले होते. आर्थिक गुन्हे शाखेने यासंदर्भात अधिक चौकशी करत लिपीक पी.आर.गायकवाड आणि ईश्‍वर पमनानी यांचाही आरोपी म्हणून समावेश केला आहे. व्यापारी मोती दुसेजा यानी 2014 मध्ये घनश्यामदास तुनिया, किशन लाहोरी, राजेश गुरदासमल दुदानी, मुकेश गुरदासमल दुदानी, चंदा लालचंद चावला यांच्याबरोबर मिळून 15 हजार चौरस फुटांची प्लॉट क्र. 620, शिट नंबर 76 ही खरेदी केली. हि मालमत्ता रजिस्टरी करताना या मालमत्तेला सनद नाही, मग रजिस्टरी कशी होऊ शकते, असा प्रश्‍न दुसेजा यानी भागीदाराना विचारला असता त्यानी या भूखंडाची बोगस सनद बनविणार असल्याचे सांगितले. दुसेजाना चुकीचे काम करायचे नसल्याने त्यानी भागीदारीचे पैसे परत घेत, या भूखंडाची सनद कशी बनली याचा तपास करण्यासाठी महसूल विभागाचे अप्पर सचिव याना तक्रार दिली होती.

दोन वर्षे केला तक्रारीचा पाठपुरावा
या तक्रारीचा दुसेजा यानी तब्बल दोन वर्षाचा पाठपुरावा केल्यानंतर तत्कालीन उपविभागीय अधिकार्‍यांनी शासनाला दिलेल्या अहवालात सनद तपासणीबाबत पुण्याच्या गुन्हे अन्वेषण विभागाने सदर सनदेवर असलेल्या सहया बोगस असल्याचे नमुद केले आहे. त्यानुसार तहसिलदार उत्तम कुंभार यांच्या आदेशाने भूखंडावर दोन महिन्याभरापुर्वी फलक ही लावला आहे. याबाबत मोती दुसेजा यानी सांगितले की या प्रकरणात दोषी आढळलेले लिपीक प्रकाश गायकवाड आणि ईश्‍वरी पमनानी यांची कोकण विभागीय आयुक्तांकडून चौकशी चालू आहे. याप्रकरणात ठाणे जिल्हाधिकारी कार्यालयाने 26 ऑक्टोबर 2017 रोजी बोगस सनद बनविणारे किशन लाहोरी, घनश्यामदास तुनिया आदी दोषींच्या विरोधात गुन्हा दाखल करण्याचे आदेश दिले होते. अखेर माध्यमांच्या दबावानंतर 10 नोव्हेंबर रोजी प्रांत अधिकारी जगतसिंग गिरासे यानी घनश्यामदास तुनिया, किशन लाहोरी, राजेश गुरदासमल दुदानी, मुकेश गुरदासमल दुदानी, चंदर चावला, सेवलदास बिजलानी, भागीबाई बिजलानी यांच्याविरोधात मध्यवर्ती पोलीस ठाण्यात गुन्हा दाखल केला होता. याप्रकरणातील प्रमुख पाच आरोपीनी अंतरिम जामिन मिळविला आहे. असे असतानाच या गुन्हयात बोगस सनदेची आणि त्याची पडताळणी करण्याच्या आरोपाखाली आर्थिक गुन्हे शाखेचे सहाय्यक पोलीस आयुक्त एस. टी. अवसरे यानी लिपीक पी.आर.गायकवाड आणि ईश्‍वर पमनानी यांचाही आरोपी म्हणून समावेश केला आहे.