ते युवक मुलींना रॉबिन हुड वाटतात

श्रीनगर । मुलींच्या मनात मुलांबद्दल कसले आकर्षण निर्माण होईल हे सांगता येणार नाही. काश्मीर खोर्‍यातील मुलींना हिज्बुल मुजाहिद्दीन या दहशतवादी संघटनेत सामील होणारी मुले रॉबिन हुड वाटतात. मुली पटविण्यासाठी, त्यांना आपल्याकडे आकर्षित करण्यासाठी काश्मीरमधील तरूण दहशतवादी होत आहेत, अशी कबुली हिज्बुल मुजाहिद्दीन या दहशतवादी संघटनेचा दहशतवादी दानिश अहमदने दिली आहे. 7 एप्रिलला त्याने भारतीय सुरक्षा दलासमोर आत्मसमर्पण केले होते. त्यानंतर त्याची कसून चौकशी करण्यात आली. या चौकशी दरम्यान त्याने ही धक्कादायक कबुली दिली आहे. स्थानिक तरूण या संघटनेत सहभागी होतात कारण त्यांना मुलींना आकर्षित करण्याची इच्छा असते. इथल्या मुलीही दहशतवाद्यांना आपला हिरो मानतात. त्यामुळे हिज्बुल किंवा तशा संघटनांशी जोडले जाणे इथल्या तरूणांना भूषणावह वाटते असेही दानिशने स्पष्ट केले आहे. हिज्बुल किंवा त्यासारख्या दहशतवादी संघटनांमध्ये तरूण गेला की मुली त्याला रॉबिन हुड समजतात. हिज्बुलमध्ये असे अनेक कमांडर आहेत ज्यांच्या अनेक प्रतिमा रूढ झाल्या आहेत. काहींना ते हिरो वाटतात काही जणांना त्याची विचारसरणी चुकीची वाटते.

अबू दुजानाकडे जबाबदारी
अबू दुजाना हा पाकिस्तानी अतिरेकी हिज्बुलमधला एक कमांडर आहे. त्याला लवकरच लष्कर-ए-तोयबा या संघटनेचा म्होरक्या करण्यात येणार आहे असेही दानिशने आपल्या कबुलीत म्हटले आहे. सबजार भट्ट या दहशतवाद्याची अंत्ययात्रा निघाली तेव्हा त्यात दानिश सहभागी होता. सबजारला 27 मे रोजी झालेल्या चकमकीत ठार करण्यात आले होते. बुर्‍हान वाणीनंतर सबजारला हिज्बुल मुजाहिद्दीनचा कमांडर करण्यात आले होते. सबजारला सबडॉन या नावानेही ओळखले जाई. बुर्‍हान वाणीचा तो खास हस्तक होता अशीही माहिती दानिशने म्हटले आहे.

हत्येचे भय
दानिशप्रमाणे अनेकांना आत्मसमर्पण करुन मुख्य प्रवाहात यायचे आहे. मात्र आत्मसमर्पण केल्यास हत्या होईल या भितीपोटी दहशतवादी संघटनेत गेलेले युवक एक पाऊल मागे घेत असल्याचे दानिशने पोलिसांना सांगितले. दानिशवर उत्तर काश्मीरच्या तरूणांना हिज्बुल मुजाहिद्दीनमध्ये सहभागी करून घेण्याची जबाबदारी देण्यात आली होती. दक्षिण काश्मीरपणे उत्तर काश्मीरमध्येही दहशतवाद पसरवता यावा म्हणून जास्तीत जास्त तरूण हिज्बुल मुजाहिद्दीनमध्ये सहभागी करून घेण्यावर भर देण्यात येणार येतो आहे असेही दानिशने म्हटले आहे.