त्यांनी गुहेत बनवला आलिशान लग्झरी बंगला

न्यूयॉर्क । आधी मानव गुहांमध्ये राहत होता. नंतर घर बांधण्याची कला मानवाला अवगत झाली आणि तो वस्ती करून राहू लागला. आज जग इतके पुढे गेले आहे की, जंगलात राहणारे अनेक लोकही आता वस्ती करून राहू लागले. मात्र, आजही मानवाला निसर्गाच्या सानिध्यात राहण्याची तेवढीच ओढ आहे. त्यामुळे अमेरिकेतील मिसौरी प्रांतामध्ये काही अशा गुहा आहेत, त्या पसंत पडल्यावर लोक खरेदी करतात व त्याचा राहण्यासाठी वापर करतात.

मिसौरीच्या फेस्टसमध्ये 15 हजार चौरस फुटांच्या एका गुहेमध्ये कर्ट आणि डेबोरा स्लीपर या दाम्पत्याने एक आलिशान बंगला बांधून घेतला आहे. या बंगल्याच्या आतमध्ये लाकडापासून पार्टिशन टाकण्यात आले आहे, तर त्याच्या भिंतीच्या जागी खडक आहेत. ही गुहा तीन एकर जमिनीताच हिस्सा असून स्लीपर दाम्पत्याने ती 2004 मध्ये खरेदी केली होती. दोन मजल्यांचा हा बंगला कोणत्याही प्रकारच्या वातावरणाचा सामना करण्यास सक्षम आहे.

या बंगल्यामध्ये ऊर्जा मिळविण्यासाठी सौर पॅनेल बसविण्यात आली आहे. या गुहा बंगल्याची खासियत म्हणजे त्याचे तापमान ना फार जास्त थंड असते, ना फार उष्ण. हा बंगला अशा ठिकाणी आहे की, तिथे राहणार्‍या लोकांना सदैव निसर्गाच्या सान्निध्यात राहिल्याचा अनुभव मिळतो.