त्रिशतक ठोकणाऱ्या मोहितला आता आयपीएलचे वेध!

नवी दिल्ली: दिल्ली रणजी संघात खेळणारा 21 वर्षीय फलंदाज मोहित अहलावतने टी20 सामन्यात त्रिशतक झळकावून एक जागतिक विक्रम रचला आहे. त्यामुळे आता या धडाकेबाज खेळाडूची नजर सध्या आयपीएलवर आहे. आयपीएलमध्ये असाच काहीतरी विक्रम करण्यासाठी तो उत्सुक असून यासाठी तो प्रयत्नशील असल्याचे सांगितले आहे. अवघ्या 72 चेंडूत 39 षटकार आणि 14 चौकार ठोकत मोहितने दणदणीत त्रिशतक ठोकले. त्यामुळे त्याच्या संघाने 20 षटकात तब्बल 416 धावांचा डोंगर रचला. तेव्हापासून मोहित बराच चर्चेत आहे.

या धडाकेबाज खेळीनंतर मोहित म्हणाला की, ‘मी असे काही केले आहे यावर अजूनही माझा विश्वास बसत नाही. मला आशा आहे की, माझ्या या खेळीमुळे गौतम गंभीरचे माझ्याकडे लक्ष जाईल.’ कारण की, दिल्लीच्या रणजी संघातही गौतम गंभीरने मोहितला स्थान दिले होते. त्यामुळे मोहितला असे वाटते की, गंभीर त्याला त्याच्या आयपीएल संघात स्थान देईल. कारण की, मोहितने आयपीएलमधील खेळाडूंच्या लिलावासाठी आपले नाव पाठवले आहे.

‘मी आयपीएल 10च्या लिलावासाठी माझे नाव पाठवले आहे. पण मला माहित नाही की, माझ्याकडे संघ मालकांचे लक्ष जाईल की नाही. पण आयपीएलमध्ये माझा खेळ दाखविण्यासाठी मी वाट पाहतो आहे.’ असेही मोहित म्हणाला. ‘ही खेळी खेळताना माझ्या डोक्यात कुठंही विक्रम करायाचा असे अजिबात नव्हते.’ असेही मोहित म्हणाला.