थकबाकीदारांच्या मालमत्तांचा आज लिलाव

जळगाव- महानगरपालिकेतर्फे मालमत्ता कर वसुलीसाठी मागील वर्षी मोहीम राबविली होती.वारंवार नोटीस देवून देखील थकबाकी न भरल्याने जाहीर लिलाव करण्याचा निर्णय घेण्यात आला आहे. 25 बड्या थकबाकीदारांच्या मालमत्तांचा लिलाव दि. 4 रोजी सकाळी 11 वाजता करण्यात येणार आहे.
मालमत्ता कर वसुलीसाठी मनपातर्फे गत वर्षी वसुली मोहीम राबविली होती.मनपाच्या चारही प्रभागातून बड्या थकबाकीदारांची यादी तयार केली गेली होती.जवळपास 400 थकबाकीदारांची यादी चौकाचौकात लावण्यात आली होती.यातील काही थकबाकीदारांनी थकबाकी भरली,तर काही थकबाकीदारांनी अद्यापही मालमत्ता कराची थकबाकी भरली नाही. त्यामुळे थकबाकीदारांच्या मालमत्तांचा जाहीर लिलाव करण्याचा मनपा प्रशासनाने घेतला आहे. दि. 4 रोजी मनपाच्या दुसर्‍या मजल्यावर जाहीर लिलावाची प्रक्रिया होणार आहे.
अडीच कोटीची थकबाकी
मालमत्ता कर न भरणार्‍या 38 बड्या थकबाकीदारांची यादी तयार करुन संबंधितांना कर भरण्यासाठी नोटीस बजावण्यात आली होती. 38 जणांकडे जवळपास अडीच कोटींची थकबाकी आहे.यातील13 जणांनी थकबाकीची रक्कम भरली.तर उर्वरित थकबाकीदारांनी थकीत रक्कम भरली नाही.त्यामुळे 25 थकबाकीदारांच्या मालमत्तांचा लिलाल होणार आहे.