दहावी-बारावीचे हॉलतिकीट मिळणार आता ऑनलाईन

शिक्षण मंडळाचा निर्णय : डॉ. अशोक भोसले यांची माहिती

पुणे : महाराष्ट्र राज्य माध्यमिक व उच्च माध्यमिक शिक्षण मंडळाकडून घेण्यात येणार्‍या दहावी आणि बारावीच्या परीक्षेचे हॉलतिकिट यंदापासून ऑनलाइन देण्यात येणार आहे. पुणे विभागीय मंडळात हॉलतिकिट ऑनलाइन दिल्याचा प्रयोग यशस्वी झाल्यानंतर आता संपूर्ण राज्यातील दहावी-बारावीच्या विद्यार्थ्यांना हॉलतिकिट ऑनलाइन देण्याचा निर्णय मंडळाने घेतल्याची माहिती मंडळाचे सचिव डॉ. अशोक भोसले यांनी दिली आहे.

दहावी आणि बारावीची परीक्षा देणार्‍या विद्यार्थ्यांना हॉलतिकिट हे सर्व विभागीय मंडळांना विभागामार्फत पुरविली जात होती, मात्र 2018 मध्ये झालेल्या फेरपरीक्षेत प्रायोगिक तत्त्वावर पुणे मंडळात हॉलतिकिट ऑनलाइन देण्याचा निर्णय घेण्यात आला. या प्रयोगाला यश मिळाल्यामुळे राज्यात 2019 आणि त्यापुढे विद्यार्थ्यांना हॉलतिकिट ऑनलाइन देण्यात येणार आहे.

शुल्क आकारू नये

मंडळाने विभागीय सचिवांना दिलेल्या सूचनांनुसार, विभागीय मंडळाच्या कार्यकक्षेतील सर्व माध्यमिक शाळा, ज्युनिअर कॉलेजांनी परीक्षेची ऑनलइन प्रवेशपत्रे प्रिंट करून विद्यार्थ्यांना द्यायची आहेत. हॉलतिकिट ऑनलाइन पद्धतीने प्रिंटिंग करताना, विद्यार्थ्यांकडून कोणतेही वेगळे शुल्क घेऊ नये, हॉलतिकिटची प्रिंट काढून त्यावर मुख्याध्यापकांचा शिक्का मारून स्वाक्षरी करावी, हॉलतिकिटामध्ये विषय व माध्यम बदल असेल, तर त्यांच्या दुरुस्त्या विभागीय मंडळाकडे येऊन कराव्यात, असे या सूचनापत्रात म्हटले आहे. हॉलतिकिटावरील फोटो, स्वाक्षरी, विद्यार्थ्यांचे नाव, जन्मतारीख व जन्मस्थळाबाबतच्या दुरुस्त्या शाळा, महाविद्यालयांनी त्यांच्या स्तरावर करून त्यांची एक प्रत विभागीय मंडळाकडे पाठवायची आहे. विद्यार्थ्यांची हॉलतिकिटे ऑनलाइन पद्धतीने मंडळाच्या वेबसाइटवर उपलब्ध होणार आहेत. त्याबाबतची वेबसाइट व दिनांक स्वतंत्रपणे कळविण्यात येणार असल्याचेही मंडळामार्फत सांगण्यात आले आहे.

शिक्का, सही आवश्यक

हॉलतिकिट विद्यार्थ्यांकडून गहाळ झाल्यास संबंधित शाळा, कॉलेजांनी पुन्हा प्रिंट काढून त्यावर लाल शाईने द्वितीय प्रत असा शेरा देऊन विद्यार्थ्यास द्यावे. फोटो चुकीचा असल्यास फोटो चिकटवून त्यावर शिक्का मारून सही करावी, अशा सूचना शाळा महाविद्यालयांना देण्याचे आदेश विभागीय सचिवांना देण्यात आल्याचे मंडळाने स्पष्ट केले आहे.