दाभोळकर हत्ये प्रकरणी आणखी तीन जण ताब्यात

औरंगाबाद : अंधश्रद्धा निर्मुलन समितीचे अध्यक्ष डॉ.नरेंद्र दाभोलकर यांची ५ वर्षांपूर्वी गोळी झाडून हत्या करण्यात आली. दाभोळकर हत्ये प्रकरणी आरोपी सचिन अंदुरेला सीबीआयने अटक केली आहे. सचिन अंदुरेच्या अटकेनंतर याप्रकरणाच्या तपासाला वेग आला आहे. एटीएसच्या पथकाने मंगळवारी सकाळी सचिन अंदुरेचा चुलत भाऊ आणि मित्रांच्या घराची झडती घेतली असून त्यांना ताब्यात घेतले आहे.

मंगळवारी पहाटे औरंगाबादमधील पैठण आणि देवळाली येथील सचिन अंदुरेचा चुलत भाऊ आणि मित्रांच्या घरी एटीएसच्या पथकाने धाड टाकली. यावेळी त्यांच्याकडून काही स्फोटकांचा साठा जप्त करण्यात आले आहे.

दरम्यान, नालासोपारा स्फोटकांचा तपास करत असताना तपास पथकाला संशयित शरद कळसकरचा जवळचा मित्र सचिन अंदुरेची माहिती मिळाली. त्या आधारे सचिनला अटक करण्यात आली आहे. सचिन औरंगाबादमध्ये एका दुकानात अकाऊंटंट म्हणून काम करत होता. सचिन अंदुरेनेच नरेंद्र दाभोलकर यांची हत्या केली, असा दावा सीबीआयकडून करण्यात आला आहे.