दारु दुकानाविरोधात संतप्त महिला धडकल्या नगरपंचायतीवर

बोदवड। येथील नगरपंचायतीने भरवस्तीत दारू दुकान सुरु करण्यासह नाहरकत प्रमाणपत्र दिल्याने शहरात वस्तीस्थळी दारुचे दुकान सुरु झाले आहे. यामुळे परिसरातील नागरिकांना याचा त्रास सहन करावा लागत असून तरुण पिढी व्यसनाधीन होत आहे. त्यामुळे संतप्त नागरिकांसह महिलांनी गुरुवार 11 रोजी सकाळी 11 वाजेच्या सुमारास नगरपंचायतीवर मोर्चा काढून संताप व्यक्त करुन सुरु असलेले दारुचे दुकान बंद करण्याची मागणी केली आहे.

मुख्याधिकार्‍यांनी दिली नाहरकत
उच्च न्यायालयाच्या आदेशान्वये शहरातील सर्व दारू दुकाने बंद झाल्यानंतर नवीन दुकान टाकण्यासाठी एका व्यावायिकाने नगरपंचायतीला अर्ज दिला होता़ मुख्याधिकारी डॉ़.नीलेश देशमुख यांनी मात्र नाहरकत दाखला दिल्यानंतर 1 मे पासून भर वस्तीत दारुदुकान सुरु झाल्याने नागरिकांचा संताप उफाळून आला़

मोर्चात यांनी घेतला सहभाग
शहरात सुरु झालेल्या या दारुच्या दुकानाला विरोध करण्यासाठी स्वामी विवेकानंद नगरापासून नगरपंचायतीवर मोर्चा काढण्यात आला. यावेळी मोर्चेकरी महिलांनी या निर्णयाविरुध्द घोषणा दिल्या. आंदोलनात नंदाबाई श्याम भोपळे, सुनीता सोनाजी चंदनकर, मंगलाबाई गंभीर कान्हे, शुभ्रा कदीर मन्यार, कमल अशोक माळी, ज्योती दीपक मराठे यांच्यासह शेकडो नागरिक व महिला सहभागी झाल्या़.

भर उन्हात निघाला मोर्चा
गुरुवार 11 रोजी मासिक सभा असल्याने या सभेत आपला विरोध दर्शनविण्याच्या नागरिकांनी स्वामी विवेकानंद नगरापासून भर उन्हात पायी मोर्चा नगरपंचायतीवर आणला. मुख्याधिकारी डॉ़.नीलेश देशमुख हे बाहेर येऊन निवेदन घेण्यास नकार देत असल्याने मोर्चेकरी अधिक संतप्त झाल़े प्रसंगी सर्व नगरसेवकांनी त्यांना त्यांच्या दालनात घेराव घातला व निवेदन घेण्यास भाग पाडला़. विशेष म्हणजे दारूबंदीला शहरातील सर्व 17 सदस्यांनी समर्थन दिले आह़े