दिघीत ‘पुणे खुले आंतरराष्ट्रीय प्रदर्शन केंद्र’; प्राधिकरणाच्या बैठकीत निर्णय

आकुर्डी  : मोशी येथील आंतरराष्ट्रीय प्रदर्शन केंद्राच्या मूळ आराखड्यात बदल करून, खुले प्रदर्शन केंद्र उभारणार असल्याचा निर्णय पिंपरी चिंचवड नवनगर विकास प्राधिकरणाच्यावतीने बैठकीत घेण्यात आला आहे. यावेळी प्राधिकरणाचे अध्यक्ष सदाशिव खाडे, मुख्य कार्यकारी अधिकारी सतीशकुमार खडके व अधिकारी आदी उपस्थित होते.

यात पुणे आंतरराष्ट्रीय प्रदर्शन केंद्राऐवजी पुणे खुले आंतरराष्ट्रीय प्रदर्शन केंद्र संबोधणार, दोनशे एकरवर असणारे केंद्र शंभर एकरवरच उभारणार, सातऐवजी तीन बंदिस्त हॉलमध्ये प्रदर्शन केंद्र, गोल्फ फोर्स, रिटेल मॉल गुंडाळणार, खुले प्रदर्शन केंद्र हे 98 हजार चौरस मीटर करणार, 35 हजार चौरस फुटांचे व्यावसायिक केंद्र आणि संग्रहालय, पाच हजार आसन क्षमतेचे कन्व्हेंशन सेंटर उभारणार असल्याचा निर्णय घेण्यात आला आहे.

प्राधिकरणाचे मुख्य कार्यकारी अधिकारी सतीशकुमार खडके म्हणाले, ‘आंतरराष्ट्रीय प्रदर्शन केंद्राच्या मूळ संकल्पनेत कोणताही बदल होणार नाही. केवळ टप्प्याटप्प्याने गरजेनुसार प्रदर्शन केंद्र विकसित करण्यात येणार आहे. तीन टप्प्यांत आणि सुमारे पाच वर्षांचे नियोजन असून पहिल्या टप्प्यात 11 हेक्टर जागेच्या सपाटीकरणाचे काम पूर्ण झाले आहे. दुसर्‍या टप्प्यातील सिमाभिंत बांधणे, वृक्षारोपण, ब्लॉक टाकणे आदी कामासाठी निविदा प्रसिद्ध केली जाणार असून त्याला प्राधिकरणाच्या सभेत मंजुरी देण्यात आली आहे.

आंतरराष्ट्रीय प्रदर्शन केंद्राऐवजी खुले केंद्र उभारण्यासाठी पहिल्या टप्प्यात पेठ क्रमांक सहामध्ये 18 एकर जागेचे सपाटीकरण करण्यात आले आहे. त्या जागेसह इतर चौदा भूखंड विविध कार्यक्रमांना तसेच प्रदर्शनासाठी भाडेतत्त्वावर देण्यात येणार असून, त्यासाठी चार किलोमीटरची सीमाभिंत बांधण्यात आली. सदर जागा प्रदर्शन व इतर कार्यक्रमांसाठी भाडेतत्त्वावर देण्यास प्राधिकरण सभेत मंजुरी देण्यात आली आहे. खुल्या प्रदर्शन केंद्रासाठी दुसर्‍या टप्प्यातील 98 हजार चौरस मीटर जागेवरील प्रदर्शन केंद्रासाठीच्या 66 कोटी रुपयांच्या खर्चालाही सभेत मंजुरी देण्यात आली. या ठिकाणी वाहनतळ विकसित करण्यात येणार आहे.