दिल्लीसाठी महाराष्ट्र भाजपची फौज; फडणवीस, तावडे, मुंडे, खडसे प्रचारासाठी मैदानात !

मुंबई : दिल्ली निवडणूक लागली आहे. आम आदमी पक्षाला सत्ता कायम राखण्यासाठी आणि भाजपने सत्ता मिळविण्यासाठी ही निवडणूक अतिशय प्रतिष्ठेची केली आहे. केंद्रात भाजपची सत्ता असल्याने भाजपने दिल्ली काबीज करण्यासाठी जोरदार तयारी सुरु केली आहे. दुसरीकडे केजरीवाल हे विकासाच्या मुद्द्यावर निवडणुकीच्या रिंगणात उतरले आहे. दिल्लीसाठी आता महाराष्ट्रातील भाजप नेते मैदानात उतरणार आहे. आज मंगळवारपासून महाराष्ट्रातील भाजप नेते दिल्ली विधानसभा निवडणूक प्रचारात सहभागी होणार आहेत. राज्यातून एकूण 25 जणांवर दिल्ली निवडणुकीची जबाबदारी दिली जाणार असून देवेंद्र फडणवीस आणि विनोद तावडे आजपासूनच दिल्लीला प्रचारासाठी रवाना होणार आहेत. तर चंद्रकांत पाटील आणि आशिष शेलार फेब्रुवारीच्या पहिल्या आठवड्यात दिल्लीत प्रचारासाठी जाणार आहेत. त्यानंतर भाजपात नाराज असलेल्या पंकजा मुंडे आणि एकनाथराव खडसे यांच्यावरही दिल्ली निवडणुकीच्या प्रचाराचा धुरा सोपविण्यात आली आहे. राज्यातील प्रत्येक नेत्याकडे एकूण 10 विधानसभा मतदारसंघाची जबाबदारी वाटून देण्यात आली आहे.

निवडणूक आयोगाने दिल्ली विधानसभा निवडणुकीची तारीख जाहीर केली आहे. विधानसभेसाठी दिल्लीमध्ये 8 फेब्रुवारीला मतदान होणार असून 11 फेब्रुवारीला निवडणुकीचे निकाल जाहीर होणार आहे. 2015मध्ये पार पडलेल्या विधानसभा निवडणुकांमध्ये अरविंद केजरीवाल यांच्या आम आदमी पार्टीला बहुमत मिळालं होतं. आम आदमी पार्टीने 67 जागांवर विजय मिळवला होता. तीन जागा भाजपच्या खात्यात गेल्या होत्या. काँग्रेसला मात्र एकाही जागेवर विजय मिळवता आला नव्हता. दिल्लीत विधानसभेच्या एकूण 70 जागा आहेत.