दिल्ली मॅरेथॉनमध्ये मोनिका आथरेला सुवर्ण!

नाशिक: नाशिकच्या मोनिका आथरेने नवी दिल्ली मॅरेथॉनमध्ये सुवर्णपदक पटकावत महाराष्ट्राचे नाव रोशन केले तर परभणीच्या ज्योती गवतेने रौप्यपदकाची कमाई महाराष्ट्रासाठी अभिमानास्पद कामगिरी बजावली आहे. नाशिकच्या मोनिका आथरेने दोन तास 39.08 मिनिटं अशी सर्वोत्तम वेळ देऊन महिलांची मॅरेथॉन जिंकली. या कामगिरीसह मोनिका जागतिक विजेतेपद स्पर्धेसाठीही पात्र ठरली.

अर्ध मॅरेथॉनमध्ये 6,000 जण सहभागी
जागतिक विजेतेपद स्पर्धेसाठी दोन तास 45 मिनिटांची वेळ हा पात्रता निकष ठरवण्यात आला होता. परभणीची ज्योती गवते दोन तास 53.48 मिनिटं वेळेसह दुसऱ्या स्थानावर आली. 42 किमीच्या पूर्ण मॅरेथॉनमध्ये जवळजवळ 1,000 लोकांनी भाग घेतला होता. तर 21 किमीच्या अर्ध मॅरेथॉनमध्ये 6,000 जण सहभागी झाले होते. या मॅरेथॉनसाठी एकूण बक्षीसांची किंमत 23 लाख इतकी होती. दिल्ली मॅरेथॉनचं फ्लॅग ऑफ मास्टर ब्लास्टर सचिन तेंडुलकर आणि इथियोपियाचे धावपटू हेल गेब्रेसलासी यांच्या हस्ते करण्यात आले होते. या कामगिरीमुळे मोनिका व ज्योतीचे सर्वस्तरांतून अभिनंदन होत आहे.