दिवसाढवळ्या महिलेची हत्या

बेळगाव । बेळगावमधील ठळकवाडीतील द्वारकानगर येथे दिवसाढवळ्या 58 वर्षीय महिलेची हत्या करण्यात आल्याची घटना घडली आहे. यामुळे बेळगावात भीतीचे वातावरण पसरले आहे. हातपाय बांधून आणि टॉवेलने गळा आवळून हत्या या महिलेची हत्या करण्यात आली आहे. भार्गवी मोरप्पणवर असे मृत महिलेचे नाव आहे.

भार्गवी यांचे पती आनंद हे बेळगावात डीएफओ असून दुपारी घरी जेवायला आले असताना हा प्रकार उघडकीस आला. सकाळी पती-पत्नी दोघेही दवाखान्यात गेले होते. त्यानंतर भार्गवी या घरी परतल्या. त्यानंतर अज्ञात व्यक्तीने घरात घुसून भार्गवी यांचे हातपाय बांधून आणि तोंडात बोळा कोंबून टॉवेलने गळा आवळून त्यांची हत्या केली.
विशेष म्हणजे भार्गवी यांच्या हत्येनंतर मारेकर्‍यांनी त्यांच्या घरातील कोणतीही वस्तू चोरली नाही. त्यामुळे ही हत्या नेमकी कशामुळे करण्यात आली याचा उलगडा होऊ शकलेला नाही. याप्रकरणी पोलिसांनी कसून तपास सुरू केला आहे तसेच मारेकर्‍याचा शोध घेण्यासाठी तीन विशेष पथकं तयार करण्यात आली आहेत.