दिव्यांग प्रशिक्षण केंद्रातील भ्रष्टाचाराबाबत खोटा अहवाल सादर

नेरुळ । नवी मुंबई महानगरपालिकेच्या वाशी येथील दिव्यांग प्रशिक्षण केंद्रात झालेले अनेक भ्रष्टाचार उघडकीस येत होते, दिव्यांग विद्यार्थ्यांच्या पालकांनाही धमकीचे प्रकार बाहेर येत होते, शिक्षकांचाही छळ होत असल्याच्या तक्रारी वारंवार येत होत्या. याच प्रकारची दखल घेत बेलापूरच्या आमदार मंदा म्हात्रे यांनी काही महिन्यांपूर्वी अचानक इटीसी केंद्राचा दौरा करून संचालिकेमार्फत झालेल्या भ्रष्टाचाराची वाचा फोडली. नवी मुंबई महापालिकेनेही या विषयाबाबत शासनाला खोटा अहवाल सादर केला होता. बेलापूरच्या आमदार मंदा म्हात्रे यांनी या विषयाबाबत लक्षवेधीच्या माध्यमातून विधानसभेत आवाज उठवून ्रष्टाचारासंबंधी उच्चस्तरीय चौकशीची मागणी केली होती. तसेच मुख्यमंत्री देवेन्द्र फडणवीस यांनीही चौकशीचे आदेश दिले आहे.

दिव्यांग प्रशिक्षण केंद्रात झालेल्या याच भ्रष्टाचारासंबंधी नगरविकास गृहराज्यमंत्री डॉ रणजीत पाटील यांच्या दालनात आज सुनावणी पार पडली. ईटीसीसंदर्भात विचारणा करण्यात आल्यावर उपायुक्त शिवाजी कदबाने यांनी मागीलप्रमाणेच खोटा अहवाल वाचण्यास सुरुवात केली. यावेळी सादर केलेला अहवाल कसा खोटा आहे, याचे पुरावेच आमदार मंदा म्हात्रे यांनी सर्वांसमक्ष राज्यमंत्री डॉ. रणजित पाटील यांना दाखविले. यावेळी अधिकार्‍यांनीही आपली चूक झाल्याचे कबुल करताच राज्यमंत्र्यांनी असे सक्षम अधिकार्‍यांकडून चुका होत असतील तर सर्वप्रथम तुमच्यापासून कारवाई केली पाहिजे, असे खडे बोल सुनावले.

दोषींवर गुन्हा दाखल होणार
या भ्रष्टाचाराचे पुरावे सादर करताच नगरविकास गृहराज्यमंत्री डॉ रणजित पाटील यांनी संबंधितांना खरा अहवाल सादर करण्यास सांगून दोषी संचालिकेवर गुन्हा दाखल करण्यात येऊन कडक कारवाई करण्यात येईल, असे सूचित केले. यावेळी कोकण उपायुक्त शिवाजी कादमाने, नवी मुंबई महानगरपालिका उपायुक्त रमेश चव्हाण, अवर सचिव नवनाथ वाथ, चंद्रकांत तायडे, अधिकारी रवींद्र जाधव, महेंद्र सप्रे, तसेच इतर संबंधित अधिकारी उपस्थित होते.