दुकानदारांकडून खंडणी उकळणारी टोळी सक्रिय

शिव व्यापारी सेनेची पालकमंत्री, पोलिसांकडे तक्रार

पिंपरी-चिंचवड : गॅस शेगडी दुरूस्ती व विक्रीचा व्यवसाय करणार्‍या दुकानदारांना ब्लॅकमेल करून लूट करणारी टोळी सक्रिय असल्याचे समोर आले आहे. एका बोगस संघटनेच्या नावाखाली ही टोळी अशा दुकानदारांकडून पैसे उकळण्याचे काम करत आहे. काळेवाडीतील एका दुकानदाराला आलेल्या अनुभवानंतर हा प्रकार उघडकीस आला आहे. यासंदर्भात शिव व्यापारी सेनेने पालकमंत्री गिरीश बापट आणि पोलिसांकडे तक्रार केली असून, छावा संघटनेच्या नावाचा वापर करून गॅस शेगडी दुरूस्ती व विक्री करणार्‍या संबंधितांवर कारवाई करण्याची मागणी त्यांनी केली आहे.

गॅस शेगडी दुरूस्ती दुकानदारांना धमक्या
शहरात गॅस शेगडी दुरूस्ती व विक्रीचा व्यवसाय करणारे अनेक लहान-मोठी दुकाने आहेत. अशा दुकानांमध्ये काही ठराविक किलोपर्यंत गॅसचा साठा करण्याचा परवाना दिला जातो. त्याच्या आधारावर गॅस दुरूस्तीचा व्यवसाय चालतो. परंतु, दुकानदार परवान्यापेक्षा अधिक किलोच्या गॅसचा साठा करत असल्याच्या नावाखाली या संघटनेने दुकानदारांना ब्लॅकमेल करण्याचा धंदा चालविला आहे. या संघटनेचे नाव घेऊन चार-पाच जणांचा समावेश असलेली टोळी गॅस शेगडी दुरूस्ती व विक्री करणार्‍या संबंधित दुकानांमध्ये जाते. तेथे तुम्ही अवैधपणे व्यवसाय करत असल्याचे सांगून पोलिस आणि अन्न व औषध प्रशासनाकडे तक्रार करण्याची धमकी देत पैशांची मागणी केली जाते.

पैसे न दिल्यास अधिकार्‍यांकडे तक्रारी
बुधवारी (दि. 28) काळेवाडी, तापकीरनगर येथील माऊली गॅस शेगडी दुरूस्ती व विक्री दुकानदाराला ब्लॅकमेल करण्याचा प्रयत्न या टोळीने केला. एका लढवय्या संघटनेच्या नावाशी साधर्म्य असल्याचे फलक घेवून जात या दुकानदाराकडे पैशांची मागणी करण्यात आली. पैसे न दिल्यास अन्नधान्य पुरवठा विभाग तसेच 100 क्रमांकावर फोन करून तक्रार करण्याची धमकी दिली. त्याला दाद न देता संबंधित दुकानदाराने पैसे देण्यास नकार दिला. त्यामुळे या टोळीतील एकाने निगडी पोलिसांना आणि अन्नधान्य पुरवठा विभागाच्या अधिकार्‍यांना घटनास्थळी बोलावून घेतले. अधिकार्‍यांनी दुकानाची तपासणी केली असता तेथे गॅसचा काळाबाजार होत नसल्याचे स्पष्ट झाले. त्यानंतर छावा संघटनेच्या टोळीने तेथून पलायन केले.