दुचाकी-बसचा अपघात; तीन जण जखमी

जामनेर । जामनेर-भुसावळ मार्गावरील महूखेडा फाटयाजवळ बस व मोटरसायकल यांच्यात झालेले अपघातात 3 जण जखमी झाल्याची घटना गुरूवार 21 डिसेंबर रोजी दुपारी 2 वाजेच्या सुमारास घडली असून जखमींना पुढील उपचारासाठी जळगावच्या जिल्हा रूग्णालयात हलविण्यात आलेले आहे. सविस्तर वृत्त असे कि, जामनेर आगाराची बस क्र.(एम.एच.19 डी 8900) ही दुपारी जामनेरहून बोरगाव जाण्यासाठी निघाली होती. सदर बस महूखेडयाकडे जाण्यासाठी महूखेडा फाटयाच्या वळण रस्तावरून वळण घेत असताना तालूक्यातीलच गंगापूरी येथून जामनेर येथे बाजार करण्यासाठी हिरोहोंडा पँशन प्रो मोटर सायकल क्र.(एम.एच. 19 ए.एस.1243) वर स्वार झालेले  तीन जण बसच्या मागील भागावर आदळल्यामूळे जमीनीवर खाली पडले तेथून त्यांना उचलून उपचारासाठी जामनेर येथील उपजिल्हा रूग्णालयात आणण्यात आले. राकेश बारेला यांची प्रकृती गंभीर जखमी असल्यामूळे तिघाना पुढील उपचारासाठी जळगाव येथील जिल्हा रूग्णालयात हलविण्यात आले असून जामनेर पोलीस गुन्हा नोंदविण्याचे काम सुरू होते.