देवस्थानच्या जमीन विक्री, जिल्हाधिकार्‍यांची परवानगी
मुंबई । राज्यातील देवस्थानच्या जमिनींना विक्रीची परवानगी देण्याचे धर्मादाय आयुक्तांना अधिकार आहे. असे असले तरी या जमिनींसाठी जिल्हाधिकार्‍यांची परवानगी आवश्यक करण्यासाठी महसूल कायद्यात तरतूद करणार असल्याची घोषणा महसूलमंत्री चंद्रकांत पाटील यांनी विधानसभेत केली. नगर जिल्ह्यातील पारनेर तालुक्यात असलेले ढवळापुरी येथील लक्ष्मीनारायण देव विष्णू मंदिर हे नाव कमी करून 137 एकर जमिनीचा करार तयार करून जमीन बेकायदेशीररीत्या विक्री केली. यासंदर्भात विधानसभा सदस्य विजय औटी यांनी तारांकित प्रश्‍न विचारला होता.
या प्रश्‍नाला उत्तर देताना महसूल मंत्री चंद्रकांत पाटील म्हणाले ब्रिटिश कालावधीत देवस्थानला दिलेल्या जमिनीची विक्री करता येणार नाही, असा कायदा आहे. ढवळापुरी येथील देवस्थानच्या जमिनी विक्री केल्यानंतर फेरफारच्या नोंदी घेण्याचे थांबविण्यात आले आहे. धर्मादाय आयुक्तांनी परवानगी दिली असल्यामुळे या संदर्भात केवळ उच्च न्यायालयात दाद मागावी लागते. तथापि, जमिनी विक्री प्रकरणाचे गांभीर्य लक्षात घेवून विभागीय आयुक्तांमार्फत एका महिन्यात जमीन विक्रीची चौकशी केली जाईल. या प्रकरणावरून राज्यातील देवस्थानाच्या जमीनी विक्री परवानगी देण्याचे अधिकार धर्मादाय आयुक्तांना असले तरी जिल्हाधिकार्‍यांची परवानगी आवश्यक करण्यासाठी महसूल कायद्यात तरतूद केली जाईल, असे चंद्रकांत पाटील यांनी स्पष्ट केले.