देशपांडेसह मनसे कार्यकर्त्यांना जामीन

मुंबई । मनसेचे नेते संदीप देशपांडे यांच्यासह आठ कार्यकर्त्यांना मुंबई प्रदेश काँग्रेसच्या कार्यालयावरील हल्ल्याप्रकरणी जामीन मंजूर झाला आहे. या आठही जणांना प्रत्येकी 15 हजाराच्या जातमुचलक्यावर मुंबई जिल्हा सत्र न्यायालयाने जामीन मंजूर केला आहे. दोन दिवसापूर्वीच सर्वांना 14 दिवसांची न्यायालयीन कोठडी सुनावण्यात आली होती. संदीप देशपांडे, मनसेचे सात कार्यकर्ते मागील दोन दिवसांपासून भायखळ्याच्या आर्थर रोड तुरूंगामध्ये आहेत. काँग्रेस कार्यालयाची तोडफोड केल्याप्रकरणी मनसेचे सरचिटणीस संदीप देशपांडे यांच्यासह संतोष सरोदे, संतोष धुरी, दिवाकर पडवळ, अभय मालप, हरिश सोळंकी, योगेश चिले आणि विशाल कोकणे यांना अटक करण्यात आली होती.

आर्थर रोड जेलमध्ये रवानगी
मुंबई प्रदेश काँग्रेसच्या कार्यालयावरील हल्ल्याप्रकरणी अटकेत असलेल्या संदीप देशपांडे यांच्यासह मनसेच्या आठ कार्यकर्त्यांना 14 दिवसांची न्यायालयीन कोठडी सुनावण्यात आली होती. या आठही जणांची भायखळ्याच्या आर्थर रोड जेलमध्ये रवानगी केली होती. छत्रपती शिवाजी महाराज टर्मिनसजवळच्या काँग्रेस कार्यालयाची शुक्रवारी (1 डिसेंबर) सकाळी नासधूस करण्यात आली होती. या कार्यालयात घुसून मनसेने काँग्रेस कार्यालयाच्या काचा फोडल्या होत्या.

ट्वीटकरून स्विकारली हल्ल्याची जबाबदारी
मुंबई काँग्रेस कार्यालयावरील हल्ल्याची जबाबदारी मनसेने स्वीकारली होती. काँग्रेसचे कार्यालय मनसेने फोडले असे ट्वीट मनसे नेते संदीप देशपांडे यांनी केल्यानंतर आणि सीसीटीव्ही फुटेज तपासल्यानंतर पोलिसांनी संदीप देशपांडेंसह आठ जणांना अटक केली होती. या सगळ्यांवर दंगल, ट्रेसपासिंग, नुकसान आणि नासधूस या कलमांअंतर्गत अटक करण्यात आली आहे. फेरीवाल्यांवरुन काँग्रेस विरुद्ध मनसे असा संघर्ष सुरु झाल्याच्या पार्श्‍वभूमीवर ही तोडफोड झाली होती.