देशात मोदी लाट ओसरली, सेनेने आक्रमकता कृतीतून दाखवावी – हर्षवर्धन पाटील
मोदी-शहांच्या हुकूशाहीला कंटाळून देशभरातील भाजपाचे आमदार, खासदार काँग्रेसच्या वाटेवर
शहर काँग्रेसच्या संवाद कार्यकर्ता प्रशिक्षण शिबिराचा समारोप
पिंपरी चिंचवड : मोदी लाट ओसरल्याची चिन्हे आहेत. नागपुरचे आमदार आशिष देशमुख, खासदार नाना पटोले यांचा काँग्रेस प्रवेश सुरूवात आहेत. शिवसेनेचे नेते सरकारमधून बाहेर पडण्याचे इशारे भाषणातून देते, त्यांनी आपली आक्रमक भूमिका कृतीतून दाखवावी, असा टोला माजी सहकार मंत्री हर्षवर्धन पाटील यांनी लगावला. पिंपरी चिंचवड शहर आणि पुणे शहर काँग्रेसच्या वतीने तळवडे येथे दोन दिवसांच्या संवाद कार्यकर्ता प्रशिक्षण शिबिराच्या समारोपाप्रसंगी हर्षवर्धन पाटील बोलत होते.
शिवसेनेत सत्तेबाहेर पडण्यात हिम्मत नाही…
मोदी-शहांच्या हुकूशाहीला कंटाळून देशभरातील भाजपाचे आमदार, खासदार काँग्रेसच्या वाटेवर आहेत. मोदी लाट ओसरल्याची ही चिन्हं आहेत. नागपुरचे आमदार आशिष देशमुख, खासदार नाना पटोले यांचा काँग्रेस प्रवेश ही सुरूवात आहे. शिवसेनेच्या नेत्यांमध्ये हिंमत असेल तर सरकारमधून बाहेर पडण्याचे इशारे भाषणात देण्याऐवजी आपली आक्रमक भूमिका कृतीतून दाखवावी. जाहिरातबाजीत फसलेले फडणवीस सरकार निष्क्रीय ठरले असल्याचे ‘जलयुक्त शिवार’ प्रकरणातून महाराष्ट्रातील शेतकर्‍याला दिसले आहे.
सचिन साठे म्हणाले की, काँग्रेसचे नेते, पदाधिकारी यांनी तळागाळात काम करणार्‍या कार्यकर्त्यांना पाठबळ द्यावे. राम मंदिर, समान नागरी कायदा, 370 कलम या प्रश्‍नांचे काय झाले, याची उत्तरे सर्वसामान्य नागरिकांना सरकारने दिली पाहिजेत. 1994 मध्ये युती सरकारने 40 लाख घरे बांधू, 25 लाख नोकर्‍या देऊ, एन्रॉन समुद्रात बुडवू अशा वल्गना केल्या होत्या. प्रत्यक्षात भाजपा-शिवसेनेचे सरकार एकही आश्‍वासन पूर्ण करू शकले नाही. त्यामुळे त्यांना जनतेने घरी बसवले. आताही अशीच परिस्थिती आहे.
यांची होती उपस्थिती….
यावेळी प्रदेश महिला काँग्रेसच्या अध्यक्षा चारुलता टोकस, आमदार रामहरी रुपनवर, महाराष्ट्र प्रदेश प्रवक्ते सचिन सावंत, प्रदेश सरचिटणीस डॉ. रत्नाकर महाजन, बाळासाहेब शिवरकर, माजी आमदार मोहन जोशी, दिप्ती चवधरी, शहराध्यक्ष सचिन साठे, पुणे शहराध्यक्ष रमेश बागवे, माजी महापौर कविचंद भाट, महिला शहराध्यक्षा गिरीजा कुदळे, श्यामला सोनवणे, माजी नगरसेवक दत्ता बहिरट, माजी नगरसेवक विष्णुपंत नेवाळे, महिला काँग्रेस प्रदेश सरचिटणीस बिंदु तिवारी, मकर यादव आदी उपस्थित होते.