देशात 100 पेक्षा जास्त पूल कोसळण्याच्या स्थितीत : गडकरी

नवी दिल्ली : केंद्र सरकारने वर्षभरात देशातील 1 लाख 60 हजार पुलांचे सेफ्टी ऑडीट केले. यामध्ये 100 हून अधिक पूल कोसळण्याच्या स्थितीत आहेत, अशी खळबळजनक माहिती लोकसभेत गुरुवारी प्रश्नोत्तराच्या तासात केंद्रीय भूपृष्ठ वाहतूकमंत्री नितीन गडकरी यांनी देशातील पुलांच्या सद्यस्थितीविषयी माहिती दिली.

महाड दुर्घटनेनंतर ऑडीट
2 ऑगस्ट 2016 मध्ये रायगड जिल्ह्यातील महाड तालुक्यात अतिवृष्टी आणि पुरामुळे सावित्री नदीवरील ब्रिटिशकालीन पूल वाहून गेला होता. यात दोन एसटी बस आणि एक कार पुराच्या पाण्यात वाहून गेली होती. महाडसारख्या घटनेची पुनरावृत्ती टाळण्यासाठी गेल्या वर्षीपासून सरकारने देशभरातील पुलांची माहिती गोळा करुन सेफ्टी ऑडीटचे काम हाती घेतले होते, असे गडकरी म्हणाले. दरम्यान, महाड दुर्घटनेला एक वर्षाचा कालावधी लोटला असला तरी पनवेल ते महाड या उपविभागातील 13 लहान आणि दोन मोठे ब्रिटिशकालीन पूल असून हे पूल अजूनही दुरुस्तीच्या प्रतिक्षेत आहेत.