दोंडाईचा येथे दोन दिवसीय शैक्षणिक कार्यशाळा उत्साहात

दोंडाईचा । हस्ती चॅरिटेबल ट्रस्ट संचलीत, हस्ती पब्लिक स्कूल अ‍ॅन्ड ज्यु.कॉलेज- दोंडाईचा येथील शिक्षकांसाठीच्या दोन दिवशीय शैक्षणिक कार्यशाळेचे आयोजन शालेय समिती चेअरमन कैलास जैन यांच्या मार्गदर्शनाने हस्ती बहुद्देशिय सांस्कृतिक भवन येथे करण्यात आले होते. या कार्यशाळेस पुण्यातील प्रा.शहाजी ढेकणे, वाडीया कॉलेज पुणे येथील प्रा.जी.सी.कुलकर्णी, प्रा.जी.आर.माळी, प्रा.लक्ष्मणराव मालुसरे तसेच महाराष्ट्र राज्यअभ्यासक्रम समिती सदस्य डॉ.दिलीप देशमुख हे तज्ञ मार्गदर्शक लाभले होते.

तज्ञ मान्यवरांचे मार्गदर्शन
या दोन दिवशीय शैक्षणिक कार्यशाळेत तज्ञ मार्गदर्शकांनी विविध शैक्षणिक विषयांवर अनमोल मार्गदर्शन केले. यात शैक्षणिक धोरणांचे उपयोजन, शाळा व शिक्षक गुणवत्ता वाढ व विषयांची समृद्धी, स्पर्धा परिक्षा महत्व व नियोजन, मानसिक क्षमता कसोटी सोबतच भाषा, गणित, विज्ञान व सा. शास्त्र याशालेय अभ्यासक्रमातील विषयांचे प्रभावी अध्यापन कसे करावे? शैक्षणिक साधनांचा वापर, प्रश्‍नपत्रिका व कृतिपत्रिका तंत्र व मंत्र, विद्यार्थ्यांचे मुल्यमापन, विद्यार्थ्यांच्या अभ्यासातील गुणवत्ता वाढ कशी करावी? त्यांचा शारीरिक, मानसिक व बौद्धीक विकास कसा साधावा? या विषयीचे मंत्र व तंत्र तसेच मुल्यशिक्षण या विषयांचा समावेश होता. या कार्यशाळेचा हस्ती स्कूल व ज्यु.कॉलेजचे सर्वच शिक्षक शिक्षिकांनी लाभ घेतला. हस्ती स्कूल दरवर्षी नियमितपणे अशा स्वरुपाच्या शैक्षणिक कार्यशाळा व उद्बोधन वर्गांचे आयोजन शिक्षक शिक्षिकांसाठी करीत असते.