जम्मू-काश्मिरात चकमक; दोन दहशतवाद्यांना यमसदनी पाठविण्यात यश !

श्रीनगरः जम्मू काश्मीरमधील शोपिया जिल्ह्यात सुरक्षा दल आणि दहशतवाद्यांमध्ये चकमक उडाली. यात दोन दहशतवाद्यांना कंठस्नान घालण्यात सुरक्षा दलाला यश आले आहे. सुरक्षा दलाला मिळालेल्या गुप्त माहितीच्या आधारे शोपिया जिल्ह्यातील इमाम साहिब भागात शोधमोहीम हाती घेण्यात आली. या संपूर्ण भागाला भारतीय लष्कराने घेराव घातला. शोधमोहीम सुरू असताना अचानक दहशतवाद्यांनी सुरक्षा दलावर गोळीबार करण्यास सुरुवात केली. या गोळीबाराला लष्कराने चोख प्रत्युत्तर दिले. या चकमकीदरम्यान दोन दहशतवादी मारले गेले. या भागात आणखी दहशतवादी लपले असल्याची माहिती मिळाल्यामुळे शोधमोहीम अद्याप सुरू ठेवण्यात आली आहे. दरम्यान, पुलवामा जिल्ह्यात झालेल्या एका चकमकीवेळी ४ दहशतवाद्यांचा खात्मा करण्यात सुरक्षादलांना यश आले होते. या चकमकीत लष्कराचे ३ जवान आणि एक पोलीस कर्मचारी जखमी झाले होते.