दोन बसमध्ये समोरासमोर धडक ; अपघातात धामणगावचे 15 विद्यार्थी जखमी

ममुराबाद फार्मसी विद्यालयाजवळ अपघात ; बसचे नुकसान

जळगाव : बैलजोडीला वाचवण्याच्या प्रयत्नात जळगावकडून धामणगावकडे जात असलेल्या बसने समोरून येणार्‍या भरधाव बसला जोरदार धडक दिली. या अपघातात एका बसमधील धामणगाव येथील 15 विद्यार्थी जखमी झाल्याची घटना शुक्रवारी दुपारी ममुराबाद फार्मसी महाविद्यालयाजवळ शुक्रवारी दुपारी 1 वाजेच्या सुमारास घडली. जखमी मुले व मुलांपैकी काहींना जिल्हा रुग्णालयात तर काहींवर खाजगी रुग्णालयात उपचारार्थ दाखल करण्यात आले आहे.

मिळालेल्या माहितीनुसार धामणगाव येथील विद्यार्थी आयटीआयला तर विद्यार्थिनी मुली बेंडाळे महाविद्यालयात शिक्षण घेताहेत. त्यामुळे या विद्यार्थ्यांनी पास काढली. असून ते दररोज धामणगाव येथुन कॉलेजला येत जात असतात. सकाळी नेहमीप्रमाणे विद्यार्थी महाविद्यालयात आले. दुपारी सुटी झाल्यानंतर विद्यार्थी जळगाव धामणगाव नांद्रा बस ( क्र. एमएच 12 एएल 1428) या बसने प्रवास करत होते. बसमध्ये 20 मुले मुली होती. शुक्रवारी दुपारी 1 वाजेच्या सुमारास ममुराबाद फार्मसी महाविद्यालयाजवळून जात असतांना रस्त्यालगतच्या बैलजोडीला वाचविण्याच्या नादात जळगाव बस समोरुन येणार्‍या मध्यप्रदेशातील बस (क्र. एमपी 09, एफए 5581) ला जोरदार धडक दिली. या धडकेत जळगाव आगाराच्या बसमधील 15 विद्यार्थी किरकोळ जखमी झाले आहेत.

हे विद्यार्थी झाले जखमी
या दुर्घटनेत मोहिनी वनराज सपकाळे (19) धामणगाव, हरेश्वर ज्ञानेश्वर सोनवणे (18),रोहिणी अरूण सपकाळे (18), माया शिवदास सोनवणे (18), रोही ज्ञानेश्वर न्यायदे (18),स्नेहा भास्कर भालेराव (17), निताली विजय सोनवणे (18), सोनल गोपाल विसपुते (17), पूनम सुपडू सपकाळे (17), धर्मेश संजय सपकाळे (18), अक्षय विजय भालेराव (18),अक्षय गोपाळ, विक्रम नथ्थू सपकाळे, (18), दिवाकर सुनील सपकाळे (18), वैभव घनश्याम खेडकर (18),अक्षय गोपाळ भालेराव (18) यांचा जखमींमध्ये समावेश आहे. घटनेची माहिती कळाल्यानंतर उपसरपंच मनीष सपकाळे, सदस्य गोकुळ सपकाळे, किशोर सपकाळे यांच्यासह संदीप प्रल्हाद सपकाळे, गोलू सपकाळे यांच्यासह गावातील तरूणांनी धाव घेत जखमींना खासगी वाहनातून जिल्हा रूग्णालयात हलविले.

या विद्यार्थ्यांना गंभीर दुखापत
धर्मेंद्र सपकाळे या विद्यार्थ्याचा थोडक्यात डोळा बचावला आहे. त्याच्या डोळ्याजवळ मात्र गंभीर दुखापत झाली आहे. मोहिनी सपकाळे या विद्यार्थिनीला उजव्या पायाला गंभीर दुखापत झाली आहे. अन्य जखमींना नाकाला तसेच हातापायाना दुखापत झाली आहे. घटनेची माहिती कळाल्यानंतर जखमींच्या नातेवाईकांनी जिल्हा रूग्णालयात धाव घेत प्रकृतीबद्दल माहिती जाणून घेतांना दिसून आले.