दोन हजारांची लाच भोवली : भुसावळ कारागृहातील पोलीस नाईक एसीबीच्या जाळ्यात

भुसावळ : दोन हजारांची लाच स्वीकारताना भुसावळ दुय्यम कारागृहातील पोलीस पोलीस नाईक अनिल लोटन देवरे यांना जळगाव एसीबीच्या पथकाने सोमवारी दुपारी एक वाजेच्या सुमारास रंगेहाथ अटक केल्याने लाचखोरांच्या गोटात प्रचंड खळबळ उडाली. कैद्याला भेटू देण्यासाठी ही लाच मागण्यात आली होती.

लाच स्वीकारताच केली अटक
तक्रारदार यांच्या नातेवाईकाविरोधात गुन्हा दाखल असून ते कारागृहात आहेत. कैद्याला भेटू देण्यासाठी आरोपी पोलीस नाईक अनिल लोटन देवरे यांनी तीन हजारांची लाच मागितली होती मात्र दोन हजार रुपये देण्याचे ठरल्यानंतर तक्रारदाराने एसीबीकडे तक्रार नोंदवली व सापळा रचण्यात आला. सोमवारी दुपारी एक वाजेच्या सुमारास भुसावळ कारागृहात तक्रारदाराकडे देवरे यांनी दोन हजारांची लाच स्वीकारताच त्यांना पंचांसमक्ष अटक करण्यात आली. हा सापळा जळगाव एसीबीचे पोलीस उपअधीक्षक शशीकांत पाटील व पोलीस निरीक्षक संजोग बच्छाव यांच्या नेतृत्वात यशस्वी करण्यात आला. एसीबीच्या ट्रॅपमुळे पोलीस वर्तुळात प्रचंड खळबळ उडाली.