धक्कादायक: अवैधरित्या जनावरांची तस्करी करणारा ट्रक घरात घुसल्याने ६ जण ठार

लखनौ – नवीन वर्षाच्या पहाटेच उत्तर प्रदेशातील चंदौलीत एक धक्कादायक घटना घडली आहे. एका ट्रकमधून अवैधरित्या जनावरांची तस्करी केली जात होती. तो ट्रक एका झोपडीत शिरल्याने झालेल्या अपघातात ६ जण ठार झाले आहे. हे सहा जण एकाच परिवारातील होते. मृतांमध्ये एक पुरुष, दोन महिला आणि तीन लहान मुलांचा समावेश आहे. यामध्ये आणखी दोन लहान मुलं गंभीर जखमी झाली असून त्यांना हॉस्पिटलमध्ये दाखल करण्यात आले आहे.

जनावरं घेऊन जाणारा ट्रक बिहारच्या दिशेने प्रवास करत असल्याची माहिती पोलिसांना मिळाली होती. त्यानुसार, पोलीस या ट्रकचा पाठलाग करत होते. पोलिसांच्या भीतीपोटी चालक ट्रक भरधाव चालवत होता. यादरम्यान, चालकाचं ट्रकवरील नियंत्रण सुटले आणि रस्त्याशेजारी असलेल्या झोपडीमध्ये ट्रक घुसला आणि सहा जणांचा जागीच मृत्यू झाला.

या घटनेविरोधात स्थानिकांनी तीव्र संपात व्यक्त करत रास्तारोको आंदोलन केले. शिवाय, पोलिसांना मृतदेह ताब्यात घेऊ दिले नाहीत. परिस्थिती नियंत्रणात आणण्यासाठी डीएम आणि एसपींनी घटनास्थळी धाव घेतली आणि गावकऱ्यांची समजूत काढण्याचा प्रयत्न केला.