धक्कादायक: एकतर्फी प्रेमातून शिक्षिका तरुणीला जिवंत जाळण्याचा प्रयत्न; वाचा गेली !

वर्धा: जालना येथील दोन प्रेमयुगुल बसले असताना तरुणाला मारहाण करून तरुणीचा विनयभंग केल्याचा प्रकार ताजा असतानाच आज विदर्भातील वर्धा जिल्ह्यातील हिंगणघाट येथे तरुणीला भर चौकात दिवसाढवळ्या जाळण्याचा धक्कादायक प्रकार घडला आहे. या तरुणीला तातडीने जवळच्या रुग्णालयात दाखल करण्यात आले असून तिची प्रकृती गंभीर असल्याचे समजते. या मुळे पीडित तरुणीचा चेहरा पूर्णपणे जळाला असून तिची वाचाही गेल्याचे डॉक्टरांनी सांगितले. पीडित तरुणी एका महाविद्यालयात तासिका तत्त्वावर शिक्षिका म्हणून काम करते.

आरोपीने हे कृत्य केल्यानंतर तो तिथून तत्काळ पसार झाला. मात्र काही तासांतच पोलीस त्याचा शोध घेत त्याला ताब्यात घेतले आहे. विकी नगराळे असे आरोपीचे नाव असून तो तरुणीच्या गावचाच रहिवासी असल्याचे पोलिसांनी सांगितले. एकतर्फी प्रेमातून हा प्रकार घडल्याचे सांगण्यात येत आहे. मात्र पोलिसांनी या घटनेबाबत अधिक माहिती देण्यास नकार दिला आहे. आज सकाळी घडलेल्या या घटनेमुळे हिंगणघाटमध्ये भीतीचे वातावरण पसरले आहे.