धनंजय मुंडे हॅकिंग प्रकरणावरून राजकारण करत आहे-प्रकाश महाजन

मुंबई – गेल्या लोकसभा निवडणुकीत ईव्हीएम हॅक करण्यात आल्याची माहिती असल्यानेच भाजपा नेते गोपीनाथ मुंडे यांची हत्या करण्यात आल्याचा खळबळजनक दावा एका हॅकरने केला आहे. या खळबळजनक दाव्यामुळे देशातले राजकारण ढवळून निघाले आहे. या प्रकरणाची चौकशी रॉ किंवा सर्वोच्च न्यायालयाच्या न्यायाधीशांकडून केली जावी, अशी मागणी विधानपरिषदेचे विरोधी पक्षनेते धनंजय मुंडेंनी केली आहे. मात्र धनंजय मुंडे हॅकिंग प्रकरणावरून केवळ राजकारण करत असल्याचे आरोप गोपीनाथ मुंडे यांचे मेव्हणे प्रकाश महाजन यांनी केले आहे.

लंडनमध्ये सुरू असलेल्या हॅकेथॉनमध्ये सईद सूजा या अमेरिकन सायबर तज्ज्ञानं ईव्हीएम मशीन हॅक केल्या जाऊ शकतात, असा दावा केला. गेल्या लोकसभा निवडणुकीत हॅकिंग झाल्याचा आणि त्याची कल्पना असल्यानेच मुंडेंची हत्या करण्यात आल्याचेही सूजा म्हणाला. महाराष्ट्र, उत्तर प्रदेश, गुजरातमधील निवडणुकांवेळीही ईव्हीएम हॅक झाल्याचा दावा त्याने केला. ग्रॅफाईट आधारित ट्रान्समीटरच्या मदतीने ईव्हीएम उघडता येऊ शकते. याच ट्रान्समीटर्सचा वापर २०१४ मध्ये करण्यात आला होता, असे सूजा म्हणाला.