धारावी पुनर्वसन प्रकल्पासाठी दुबईतील व्यावसायिक सरसावले

मुंबई । गेले अनेक वर्षे रखडलेला धारावी पुनर्वसन प्रकल्प आता अखेर मार्गी लागण्याची चिन्हे दिसू लागली आहेत. दुबईतील प्रसिद्ध एमबीएम समूहाने मुंबईतील धारावी झोपडपट्टी पुनर्वसन प्रकल्पासह राज्यातील विविध नागरी पायाभूत सुविधांच्या कामांमध्ये महाराष्ट्राला सहकार्य करण्यास सहमती दर्शवली आहे. यामुळे आता धारावीचा विकास करण्यासाठी अखेर दुबईमधील व्यावसायिक पुढे सरसावले आहेत.

यासोबतच डीपी वर्ल्ड समुहाने मल्टिमॉडल लॉजिस्टिक पार्कच्या उभारणीत आणि थुम्बे समूहाने आरोग्य क्षेत्रातील उपक्रमांमध्ये सहयोग देण्याची तयारी दाखवली आहे. यासंदर्भात मुख्यमंत्री देवेंद्र फडणवीस यांची नुकतीच दुबईत या तिन्ही समूहाशी सकारात्मक चर्चा झाली असल्याची माहिती मुख्यमंत्री कार्यालयाने दिली आहे. मुख्यमंत्री फडणवीस यांच्या नेतृत्वाखालील राज्याचे शिष्टमंडळ शनिवारी कॅनडा आणि अमेरिकेच्या दौर्‍यावर रवाना झाले आहे. या दौर्‍यात अनेक संस्था, कंपन्यांशी ते संवाद साधणार असून, त्यातून राज्यातील कृषी विकास, पायाभूत सुविधा उभारणी आणि राज्याच्या विकासासाठी उपयुक्त ठरणार्‍या माहिती-तंत्रज्ञानावर आधारित उपक्रमांना गती देण्यासाठी प्रयत्न केले जाणार आहेत, अशीही माहिती मुख्यमंत्री कार्यालयाने दिली आहे.

या दौर्‍याच्या पहिल्या टप्प्यात मुख्यमंत्र्यांच्या नेतृत्वाखालील या शिष्टमंडळाचे दुबईत आगमन झाले. यावेळी डीपी वर्ल्डचे समूह अध्यक्ष आणि मुख्य कार्यकारी अधिकारी सुलतान अहमद बिन सुलायेम यांच्याशी मुख्यमंत्री देवेंद्र फडणवीस यांनी चर्चा केली. कॉर्पोरेट व्यवहार उपाध्यक्ष अनिल मेहता आणि महाराष्ट्र सरकारचे वरिष्ठ अधिकारी यावेळी उपस्थित होते. डीपी वर्ल्डने राज्य सरकारसोबत मल्टिमॉडल लॉजिस्टिक पार्कच्या उभारणीत योगदान देण्याची तयारी दर्शवली. विशेषत: नागपुरात काम करण्यास हा समूह उत्सुक आहे. डीपी वर्ल्ड ही जगातील आघाडीची कंपनी राष्ट्रीय गुंतवणूक आणि पायाभूत सुविधा निधीमध्ये (एनआयआयएफ) भागीदार असलेली कंपनी आहे.एमबीएम समूहाचे चेअरमन शेख मोहम्मद बिन जुमा अल मक्तुम यांच्याशीही मुख्यमंत्र्यांची शनिवारी सायंकाळी दुबईत भेट झाली. मुंबईतील धारावी झोपडपट्टी पुनर्वसन प्रकल्पासह राज्यातील विविध नागरी पायाभूत सुविधांच्या प्रकल्पांसाठी सहकार्य करण्याविषयी शेख मोहम्मद बिन जुमा अल मक्तुम यांनी या भेटीत सहमती दाखवली असल्याची माहिती देण्यात आली.

सामंजस्य करार करण्याचीही तयारी
थुम्बे समूहाचे संस्थापक अध्यक्ष थुम्बे मोईदीन यांनी सायंकाळी मुख्यमंत्री फडणवीस यांची भेट घेतली. महाराष्ट्र सरकारसोबत आरोग्यसुविधा क्षेत्रात काम करण्याची तसेच यासंदर्भात सामंजस्य करार करण्याचीही तयारी त्यांनी दर्शवली आहे. मध्यपूर्वेतील प्रभावशाली 100 कंपन्यांच्या यादीत थुम्बेचा समावेश असून, विविध 13 क्षेत्रात हा समूह कार्यरत आहे. सुमारे 80 राष्ट्रांतील विद्यार्थ्यांना सोबत घेऊन या कंपनीचा शिक्षण आणि आरोग्यक्षेत्रात प्रवास सुरू आहे. या समूहासोबत सामंजस्य करार झाल्यास देशातील अनेक राज्यांना याचा फायदा होणार आहे तसेच या करारांतर्गत राबवण्यात येणार्‍या विविध प्रकल्पांमुळे मोठ्या प्रमाणात रोजगारही निर्माण होण्याची शक्यता मुख्यमंत्र्यांच्या शिष्टमंडळाने वर्तविली आहे.