धावत्या बसमधून पडल्याने प्रवाशाचा मृत्यू ; निष्काळजी वाहकाचे अखेर निलंबन

यावल पोलिसात बस चालकासह वाहकाविरुद्धही गुन्हा दाखल

यावल- धावत्या बसमधून पडल्याने भुसावळच्या प्रवाशाचा मृत्यू झाल्याची घटना रविवारी यावल शहरात घडले होते. या घटनेत बस चालकासह वाहकाचा निष्काळजीपणा कारणीभूत ठरल्याचा ठपका ठेवत वाहकाचे निलंबन करण्यात आल्याने एस.टी.कर्मचार्‍यांमध्ये खळबळ उडाली आहे. दरम्यान, बुधवारी यावल पोलिसात एस.टी.च्या बस चालकासह वाहकाविरूध्द गुन्हा दाखल करण्यात आला.

प्रवाशाचा मृत्यू : चालक-वाहकाविरुद्ध गुन्हा
यावल आगारातून यावल-भुसावळ बस (क्रमांक एम.एच.20 बी.एल. 1641) या बसमधून यावल ते भुसावळ प्रवास करणारे प्रवासी बंटी गुलाबचंद डोलतानी (रा.सिंधी कॉलनी, भुसावळ) हे अचानक बसचा दरवाजा उघडल्याने जमिनीवर पडल्याने मृत झाल्याची घटना रविवारी रात्री 8.40 वाजता घडली होती. डोलतानी हे भुसावळ जाण्यासाठी शहरातील फालक नगर बस थांब्या वरून बसला होते व तेथून काही अंतरावरच बीएसएनएल कार्यालयाच्या पुढील वळणावर अचानक बसचा दरवाजा उघडल्याने व धावत्या बसमधून थेट रस्त्यावर कोसळल्याने त्यांच्या डोक्याला जबर दुखापत झाल्याने उपचारादरम्यान त्यांचा मृत्यू झाला होता. याा प्रकरणी यावल पोलिसात बुधवारी शेखर पटेल यांनी दिलेल्या फिर्यादीवरून एस.टी.बसचे चालक संजय वासुदेव खलसे यांनी रस्त्याच्या परीस्थितीकडे दुर्लक्ष करीत बस बेदरकारपणे चालवल्याने तसेच वाहक जगन्नाथ राजाराम महाजन यांनी बसचा दरवाजा व्यवस्थित बंद न करता डबल बेलचा इशारा दिला व बंटी डोलतानी यांच्या मृत्यूस कारणीभूत ठरल्याने त्यांच्याविरुद्ध गुन्हा दाखल करण्यात आला. तपास पोलिस उपनिरीक्षक सुनीता कोळपकर, सहाय्यक फौजदार राजेंद्र पाटील, हवालदार गोरख पाटील करीत आहे.

निष्काळजी वाहकाचे अखेर निलंबन
बुधवारी परीवहन मंडळाने या दुर्घटनेस जवाबदार धरत तसेच परीवहन विभागाच्या अधिनियमनानुसार कामात निष्काळजीपणा केल्याचा ठपका ठेवत वाहक जगन्नाथ राजाराम महाजन यांना निलंबित केले. दरम्यान या घटनेपूर्वीच यावल शहरातील प्रमोद वाणी यांच्यावरदेखील असाचं प्रसंग ओढवला होता. जळगावहून ते यावलला येत असतांना किनगाव ते साकळी दरम्यान अचानक चालत्या बसचा दरवाजा उघडला मात्र ते थोडक्यात बचावले.1