धावपटू बोल्टवर सुवर्णपदक गमावण्याची वेळ
स्वित्झर्लंड । जमैकाचा विश्वविक्रमवीर धावपटू उसेन बोल्टला बीजिंग ऑलिम्पिकमध्ये जिंकलेले एक सुवर्णपदक गमावण्याची वेळ आली आहे. रिले संघातील सहकारी उत्तेजक चाचणीत दोषी आढळल्याने त्यांचं सुवर्ण काढून घेण्यात आले आहे. त्याला व सर्व खेळाडूंना सर्वात मोठा धक्का बसला आहे. 2008 सालच्या बीजिंग ऑलिम्पिकमध्ये बोल्टचा समावेश असलेल्या जमैकाच्या संघानं फोर बाय हंड्रेड मीटर रिले शर्यतीत सुवर्णपदकाची कमाई केली होती.
टोबॅगोच्या संघाला पहिले स्थान
पण त्या संघाचा सदस्य असलेल्या नेस्टा कार्टरनं प्रतिबंधित उत्तेजकांचं सेवन केल्याच आयओसीनं केलेल्या पुनर्तपासणीत स्पष्ट झालं आहे. या तपासणीमुळे जमैकन संघाचे बीजिंगंधलं रिलेचं सुवर्णपदक काढून घेतले जाणार आहे. त्याऐवजी ट्रिनिदाद आणि टोबॅगोच्या संघाला पहिल्या स्थानी बढती मिळाली असून, जपानला रौप्य तर ब्राझिलला कांस्यपदक बहाल केलं जाणार आहे.
बोल्ट आठ सुवर्ण पदांचा मानकरी
बोल्टकडे एकूण नऊ सुवर्णपदकं जमा होती, त्यापैकी एक परत करावे लागल्याने ती संख्या आठवर पोहचली आहे.बोल्टने बीजिंगमध्ये फोर बाय हंड्रेड मीटर रिलेसह 100 आणि 200 मीटर शर्यतींची सुवर्णपदके मिळवली होती. लंडन आणि रिओ ऑलिम्पिकमध्येही त्याने याच तीन शर्यती जिंकून सुवर्णपदकांची ट्रिपल हॅटट्रिक साजरी केली होती. बीजिंगमधलं एक सुवर्णपदक त्याला परत करावे लागले आहे.