धोनीने केला सुपर विजय!

पुणे। प्रत्येक चेंडूगणिक उत्कंठा वाढविणार्‍या सामन्यात पुन्हा एकदा महेंद्रसिंग धोनीने बेस्ट फिनिशरची भूमिका निभावत पुण्याच्या संघाला बाजी मिळवून दिली. रोमांचक झालेल्या या सामन्यात पुणे सुपर जायंटस संघाने सनरायझर्स हैदराबादवर 6 गडी राखून विजय मिळवला. महेंद्रसिंह धोनी या विजयाचा शिल्पकार ठरला. आयपीएलचा दहावा हंगाम सुरु झाल्यापासून खराब फॉर्मवरुन सातत्याने टीकेचा सामना करणा-या धोनीने आपल्या खेळीने टीकाकारांना चोख प्रत्युत्तर दिले. शेवटच्या चेंडूवर विजयासाठी दोन धावांची गरज असताना धोनीने आपल्या स्टाईलमध्ये चौकार ठोकून विजयावर शिक्कामोर्तब केले. हैदराबादने विजयासाठी 177 धावांचे लक्ष्य दिले होते. धोनीने 34 चेंडूत नाबाद (61) धावा फटकावल्या. यात पाच चौकार आणि तीन षटकारांचा समावेश होता. मनोज तिवारी आणि धोनीने 23 चेंडूत नाबाद 58 धावांची भागीदारी करुन विजय संपादित केला.

राहुल त्रिपाठीचाही दणका
सलामीवीर अजिंक्य रहाणे अवघ्या दोन धावांवर माघारी परतल्यानंतर सलामीवीर राहुल त्रिपाठी आणि कर्णधार स्टीव्ह स्मिथने डाव सावरला. राहुलने (59) धावांची अर्धशतकी खेळी केली तर, स्मिथने (27) धावा केल्या. धोनीने आज आपल्या लौकीकाला साजेसा खेळ केला. शेवटच्या दोन षटकांत 30 धावा हव्या असताना 19 व्या षटकात धोनीचे रौद्र रूपच पहायला मिळाले. या षटकात पहिल्या तीन चेंडूवर 2 चौकार आणि 1 षटकार ठोकत संघाला विजयासमीप आणून ठेवले. शेवटच्या षटकात 11 दहाव्या हव्या असताना मानिज तिवारीने पहिल्या चेंडूवर चौकार ठोकला. यानंतर सलग तीन चेंडूवर एक-एक धाव मिळाल्याने सामना रोमांचक झाला. पाचव्या चेंडूवर 2 धावा घेत शेवटच्या चेंडूत 2 धावांची गरज असताना धोनीने शानदार चौकार खेचत पुण्याला तिसरा विजय मिळवून दिला.

हेनरीक्सने तुफान फटकेबाजी
सनरायजर्स हैदराबादकडून डेव्हीड वॉर्नर आणि शिखर धवनने संघाला चांगली सुरुवात करुन दिली. दोघांनी पहिल्या विकेटसाठी 55 धावांची भागीदारी केली. वॉर्नरने (43) आणि धवनने (30) धावा केल्या. हाणामारीच्या षटकांमध्ये हेनरीक्सने तुफान फटकेबाजी केली. त्याने 28 चेंडूत नाबाद (55 )धावा केल्या. हुडाने (19) धावांवर नाबाद राहून त्याला चांगली साथ दिली. हेनरीक्सने त्याच्या अर्धशतकी खेळीत दोन षटकार आणि सहा चौकार लगावले. हैदराबादने पुण्याच्या शादुर्ल ठाकूरची गोलंदाजी फोडून काढली. शार्दुलच्या चार षटकात 50 धावा वसूल केल्या. त्याला एकही विकेट घेता आली नाही. पुणे सुपर जायंटसने नाणेफेक जिंकून गोलंदाजीचा निर्णय घेतला.