धोनीने सुरू केला नवा बिझनेस

रांची । भारतीय संघाचा सर्वात यशस्वी माजी कर्णधार महेंद्रसिंह धोनी याने एक नवा बिझनेस सुरू केलाय. कसोटी क्रिकेटमधून निवृत्ती घेतल्याने त्याच्याकडे आता बराच मोकळा वेळ असतो. या मोकळ्या वेळात त्याने हा बिझनेस सुरू केलाय. सेव्हन या नावाने माहीने स्पोर्ट्सवेअरची नवीन रेंज सुरू केलीये. याच्या पहिल्या शोरूम उद्घाटन त्याने नुकतेच त्याच्या रांची या शहरात केले आहे.

धोनीने आपला खास फोटो आपल्या इन्स्टाग्राम अकाऊंटवर शेअर केला आहे. रांची येथील न्यूक्लियस मॉलमध्ये धोनीच्या दुकानाचा नुकताच शुभारंभ करण्यात आला. यावेळी शूज, खेळाशी संबंधित सामुग्री आणि इतर वस्तू या शोरूममध्ये मिळतील. धोनीने सुरू केलेल्या या रेंजचे आऊटलेट संपूर्ण देशभरात सुरु करण्यात येणार आहेत. वर्षअखेरपर्यंत सुमारे 20 ते 25 आणखी आऊटलेट उघडले जातील. तर 2020 पर्यंत देशात यांची संख्या वाढून जवळपास 275 केली जाईल, असंही धोनीने सांगितलं.