नऊवारी साडी नेसून 13 हजार फुटांवरून ‘स्काय डायव्हिंग’!

पुणे (प्रतिनिधी) – मराठमोळी संस्कृती जगाच्या कानाकोपर्‍यात पोहोचण्यासाठी पुण्याच्या लेकीने विश्वविक्रम केला आहे. थायलंड येथे तब्बल तेरा हजार फूट उंचीवरून मराठमोळ्या शीतल महाजनने उडी घेतली. शीतलने स्काय डायव्हिंग या साहसी खेळात 17 राष्ट्रीय व 6 जागतिक विक्रम नोंदविले आहेत. एवढे विक्रम नावावर करणारी ती पहिला भारतीय महिला ठरली आहे. महाराष्ट्राची संस्कृती दर्शविणारी मराठमोळी नऊवारी साडी नेसून, तिने उडी मारल्याने याला विशेष महत्व प्राप्त झाले. शीतल ही पुण्याची लेक असून, तिचे जळगावशी रक्ताचे नाते आहे. तिला पद्मश्री पुरस्कारदेखील मिळाला आहे.

बहिणाबाई चौधरी यांची पणती
रविवारीच हा विक्रम करण्याची पूर्ण तयारी शीतलने केली होती. परंतु, खराब हवामानामुळे तिला 10 हजार फुटांवरूनच माघारी फिरावे लागले. सोमवारी मात्र हवामानाने साथ दिल्याने हा विक्रम नोंदविणे शक्य झाले. मराठी संस्कृतीचे जतन व्हावे, तसेच मराठी बाणा कायम राहावा याकरिता नऊवारी साडी परिधान करून शीतलने हा विक्रम केला. शीतल महाजनचा जन्म पुण्यात झाला असून, मूळ गाव जळगाव आहे. ती ख्यातनाम कवयित्री बहिणाबाई चौधरी यांची पणती आहे. बहिणाबाई चौधरींचे नातू कमलाकर महाजन यांच्या त्या सुकन्या आहेत.

विविध विक्रमांची नोंद
शीतल महाजन हिने आजपर्यंत 7000 हून अधिक वेळा पॅराशूट जम्प केल्या आहेत. त्यापैकी सर्वात जास्त 13,500 फुटावरून आणि त्यातील काही 18,000 फुटावरून व एक पॅराशूट जम्प ऑक्सिजनच्या सहाय्याने 30 हजार फुटांवरून केली आहे. सात विविध प्रकारांच्या विमानातून जगातील सातही खंडावर विविध ठिकाणांवर जसे की उत्तर ध्रुव (आर्क्टिक) आणि दक्षिण ध्रुव (अंटार्क्टिका) आणि भारत व फिनलॅन्ड, अमेरिका, स्पेन, ऑस्ट्रेलिया, युरोप, साऊथ आफ्रिका, साऊथ अमेरिका येथे पॅराशूट जम्प केल्या आहेत. शीतल हिने रिझोना येथे दहा तासांचे व्हरटिकल विन्ड टनलमध्ये ट्रेनिंग घेतले आहे. बालपणापासूनच शीतलला काहीतरी नवे करण्याचा ध्यास होता. यातच तिला पॅराशूट जम्पिगची आवड निर्माण झाली.