नगरच्या भाजप खासदाराविरुद्ध खंडणीचा गुन्हा

नगरसेवक मुलगाही आरोपी

अहमदनगर : फोर्ड शोरूममधील मॅनेजर व सेल्स मॅनेजर यांचे अपहरण व मारहाण करून खंडणी मागितल्याप्रकरणी खासदार दिलीप गांधी, त्यांचा मुलगा नगरसेवक सुवेंद्र गांधी, कार्यकर्ता पवन गांधी, सचिन गायकवाड यांच्याविरोधात अखेर गुन्हा दाखल करण्यात आला आहे. याप्रकरणी फोर्ड शोरूमचे संचालक भूषण बिहाणी यांनी दाखल केलेल्या याचिकेवर निर्देश देताना हा तपास सीआयडीकडे द्यावा. तसेच 24 तासांत दिलीप गांधी यांच्यासह त्यांच्या कार्यकर्त्यांवर गुन्हे दाखल करावे, असे निर्देश उच्च न्यायालयाच्या औरंगाबाद खंडपीठाने शुक्रवारी पोलिस महानिरीक्षकांना दिले होते. या निर्देशानुसार ही कारवाई करण्यात आली.

पोलिसांनी दखल घेतली नाही!
खासदार दिलीप गांधी यांनी फोर्ड शोरूमचे संचालक भूषण बिहाणी यांच्याकडून 2015 मध्ये फोर्ड कंपनीची इंडेव्हर गाडी खरेदी केली होती. हवा तो क्रमांक मिळण्यासाठी त्यांनी गाडीची उशिरा नोंदणी केली. त्या दरम्यान, गाडीबाबत तक्रारी केल्या. 29 सप्टेंबर 2015 रोजी सुवेंद्र गांधी, सचिन गायकवाड, पवन गांधी व इतर लोकांनी शोरूमचे मॅनेजर व सेल्स मॅनेजर यांचे अपहरण केले. त्यांना मारहाण करून खंडणीची मागणी केली. त्यावेळी संबंधितांनी शोरूममधून दहा इको स्पोर्ट्स गाड्याही नेल्या होत्या. त्यातील नऊच परत करण्यात आल्या. दिलीप गांधी यांच्या मुलाने बंदुकीचा धाक दाखवून वेळोवेळी पैशाची मागणी केली असून, सुमारे 50 लाख रुपयांची खडणी घेतली, अशी बिहाणी यांनी तक्रार केली होती. या तक्रारीची पोलिसांनी दखल घेतली नव्हती.

बिहाणी यांची पीएमओेकडे तक्रार
बिहाणी यांनी 10 ऑक्टोबर 2016 रोजी थेट पंतप्रधानांकडे तक्रार अर्ज पाठवला आहे. पंतप्रधान कार्यालयाने तो पुढील कारवाईसाठी जिल्हा पोलिस अधीक्षकांकडे पाठवला होता. पण त्यांनी गुन्हा दाखल केला नाही. त्यानंतर बिहाणी यांनी 2017 मध्ये उच्च न्यायालयात राज्य सरकार, पोलिस अधीक्षक, एमआयडीसी पोलिस ठाणे व पोलिस महानिरीक्षक यांच्या विरोधात याचिका दाखल केली होती.