नगरसेविका सुजाता पालांडे यांचा जामीन अर्ज फेटाळला

कोणत्याही क्षणी अटक होण्याची शक्यता

पिंपरी : पिंपरी-चिंचवड महापालिकेतील भाजपच्या नगरसेविका सुजाता पालांडे यांच्याविरोधात टपरी धारकाला आत्महत्येसाठी प्रवृत्त केल्याचा गुन्हा दाखल करण्यात आला आहे. या प्रकरणात जामीन मिळविण्यासाठी त्यांनी पुणे जिल्हा सत्र न्यायालयात केलेला अर्ज फेटाळण्यात आला आहे. त्यामुळे पालांडे यांच्या अडचणींमध्ये वाढ झाली असून त्यांना कोणत्याही क्षणी अटक होण्याची शक्यता आहे. काही दिवसांपूर्वी पिंपरी, संत तुकारामनगरमधील एका टपरीधारकाने राहत्या घरी गळफास घेऊन आत्महत्या केली होती. या व्यवसायिकाने आपल्या ‘सुसाईड नोट’मध्ये नगरसेविका सुजाता पालांडे यांच्या त्रासाला कंटाळून आत्महत्या करत असल्याचे नमूद केले होते. त्यानुसार नगरसेविका पालांडे यांच्यावर आत्महत्येस प्रवृत्त केल्याचा गुन्हा पिंपरी ठाण्यात दाखल करण्यात आला आहे.

पालांडे या परागंदा आहेत. अटक पूर्व जामिनाकरिता पालांडे यांनी पुणे जिल्हा सत्र न्यायालयात अर्ज दाखल केला होता. मात्र, हा अर्ज न्यायालयाने फेटाळला आहे. यामुळे त्यांना कोणत्याही क्षणी अटक होऊ शकते.