नयना पुजारी हत्याकांडातील तिन्ही आरोपींना फाशी

पुणे : संगणक अभियंता नयना पुजारी खूनप्रकरणात दोषी आढळलेले योगेश राऊत, महेश ठाकूर आणि विश्‍वास कदम या तिन्ही दोषींना मंगळवारी विशेष न्यायाधीश एल. एल. येनकर यांनी फाशीची शिक्षा सुनावली. नयना पुजारी यांच्यासोबत घडलेली घटना ‘दुर्मिळातील दुर्मिळ’ असल्याचे निकाल सुनावताना न्यायाधीशांनी स्पष्ट केले. या निकालाबाबत सर्वत्र समाधान व्यक्त केले जात आहे.

गेली सात वर्षे सुरू असलेल्या या खटल्यात या तिन्ही आरोपींना खून, सामुहिक बलात्कार, अपहरण, जबरी चोरी, मृताच्या अंगावरील ऐवज चोरणे, कट रचणे, अशा कलमांखाली सोमवारी न्यायालयाने दोषी ठरवले होते. या प्रकरणातील माफीचा साक्षीदार राजेश चौधरी याला सोडण्याचे आदेश न्यायालयाने सोमवारीच दिले होते.

या खटल्यात सरकार पक्षाकडून 37 साक्षीदारांच्या साक्षी नोंदवण्यात आल्या. अ‍ॅड. निंबाळकर यांना अ‍ॅड. सत्यम निंबाळकर, अ‍ॅड. हृषीकेश कांबळे यांनी साहाय्य केले. बचाव पक्षाकडून अ‍ॅड. बी. ए. अलुर, अ‍ॅड. रणजित ढोमसे-पाटील, अ‍ॅड. अंकुशराजे जाधव यांनी तेरा साक्षीदारांच्या साक्षी नोंदविल्या.

निर्भयाचा दाखला
सरकारी पक्षाचे वकील अ‍ॅड. हर्षद निंबाळकर यांनी दिल्लीतील निर्भया प्रकरणाचा दाखला देत तिन्ही आरोपींना फाशीची शिक्षा देण्याची मागणी न्यायालयाकडे केली. अ‍ॅड. निंबाळकर यांनी या खटल्यातील क्रौर्याकडे न्यायालयाचे लक्ष वेधले. तिन्ही नराधामांना फाशीची शिक्षा देण्याची मागणी करतानाच अ‍ॅड. निंबाळकर यांनी यापूर्वी घडलेल्या अनेक प्रकरणांचे आणि त्यात न्यायालयाने सुनावलेल्या फाशीच्या शिक्षेचे दाखले दिले. आरोपींनी अत्यंत थंड डोक्याने हे घृणास्पद कृत्य केल्याचेही त्यांनी न्यायालयाच्या निदर्शनास आणून दिले. बचाव पक्षाच्या वकिलांनी माफीचा साक्षीदार राजेश चौधरी याला सहआरोपी करण्याची मागणी केली आहे.

गुन्ह्यात गोवल्याचा आरोपींचा दावा
शिक्षा सुनावण्यापूर्वी दोषींना न्यायालयासमोर स्वत:ची बाजू मांडण्याची अखेरची संधी देण्यात आली. यावेळी योगेश राऊत याने आपण हा गुन्हा केला नसल्याचा दावा केला. न्यायालयात आणताना आणि नेताना पोलिसांकडून आपल्यावर दबाव आणला जातो. मला या गुन्ह्यात गोवण्यात आले आहे, असे त्याने सांगितलेे. तसेच, राजेश चौधरीही गुन्ह्यात सहभागी होता. त्यामुळे त्यालाही शिक्षा करण्यात यावी, अशी मागणी राऊतने केली. माझ्या आईचा, लहान मुलीचा आणि पत्नीचा विचार करून शिक्षा कमी करावी, अशी विनंतीही राऊतने केली. न्यायालयाने ती फेटाळून लावली. महेश ठाकूर याने न्यायालयासमोर काहीही बोलण्यास नकार दिला. या प्रकरणातील तिसरा दोषी विश्वास कदम यानेही न्यायालयासमोर आपली बाजू मांडताना माफीचा साक्षीदार झालेल्या राजेश चौधरीने हा गुन्हा केल्याचा दावा केला. त्यामुळे राजेश चौधरीलाही शिक्षा देण्याची मागणी त्याने केली.

तासभर आधीच न्यायालयात दाखल
आरोपी राऊत, ठाकूर व कदम यांना सोमवारी सकाळी अकराच्या सुमारास न्यायालयात हजर करण्याचे आदेश देण्यात आले होते. मात्र, कारागृह प्रशासन आणि पोलिसांकडून आरोपींना हजर करण्यास सुमारे तासभर विलंब झाल्याने न्यायालयाने कारागृह प्रशासनाला नोटीस बजावली होती. त्यामुळे मंगळवारी दोषींना खटल्याच्या तासभर आधीच न्यायालयात आणण्यात आले होते.

दुर्मिळातील दुर्मिळ घटना
आरोपींनी केलेल कृत्य महिलांच्या सुरक्षेला धक्का पोचवणारे आहे. पुजारी कुटुंबावर या घटनेचा जेवढा परिणाम झाला तेवढाच बाहेर काम करणार्‍या महिलांवरही झाला आहे. महिलांना आदराने वागवले पाहिजे. मात्र, सध्याची परिस्थिती पाहता महिलांवर अत्याचाराचे प्रमाण वाढले आहे. निर्भया प्रकरणासारखेच हे प्रकरण गंभीर असून,दुर्मिळातील दुुर्मिळ घटना असल्याने आरोपींना फाशीची शिक्षा द्यावी, असे अ‍ॅड. निंबाळकर यांनी न्यायालयास सांगितले.