नरेंद्र मोदींनी भाषणासोबत कामही केले – बिल गेट्स

नवी दिल्ली । मायक्रोसॉफ्टचे संस्थापक बिल गेट्स यांनी पुन्हा एकदा पंतप्रधान नरेंद्र मोदींचे कौतुक केले आहे. मोदींनी केवळ भाषणच केले नाही तर त्यांनी त्यासोबत कामही केले असे सांगत बिल गेट्स यांनी नरेंद्र मोदींच्या स्वच्छ भारत अभियानाचे कौतुक केले. सार्वजनिक स्तरावर बोलण्यास आपण धजावणार नाही, अशा समस्येला मोदी यांनी वाचा फोडली, असे गेट्स यांनी म्हटले आहे.

बिल गेट्स यांनी ब्लॉगमधून नरेंद्र मोदी यांच्या स्वच्छता अभियानावर भाष्य केले आहे. या ब्लॉगमध्ये, मोदींच्या अभियानाचे गेट्स यांनी भरभरून कौतुक केले. मोदी सरकारने स्वच्छता आणि उघड्यावर शौचावर जाण्याचे प्रमाण करण्यासाठी मागील तीन वर्षात उचललेली पावले कौतुकास्पद आहेत, असे गेट्स म्हणालेत. मोदींनी जनआरोग्याच्या दृष्टीने धाडसी विधान केले होते. एखाद्या निर्वाचित सदस्याकडून अशा स्वरूपाचे विधान खूप कमी वेळा ऐकतो असे सांगत गेट्स यांनी मोदींच्या तीन वर्षांपूर्वीच्या लाल किल्ल्यावरील भाषणाची आठवण करून दिली. गेट्स यांनी मोदींच्या भाषणातील महत्त्वाचा भाग ब्लॉगमध्ये मांडला. आपण 21व्या शतकात राहतो. आपल्या माता-बहिणी उघड्यावर शौचासाठी जातात. आपल्याला यावरून कधी खंत वाटत नाही का? असे गेट्स यांनी नमूद केले. पंतप्रधानसारख्या मोठ्या पदावर असताना एखाद्या नेत्याने हा मुद्दा मांडल्याचे मला आठवत नाही. मोदींनी फक्त भाषण केले नाही, तर त्यादिशेने कामही केले असे गेट्स यांनी आवर्जून नमूद केले. सन 2014 मध्ये स्वच्छ भारत मोहीम सुरू झाली होती. त्यावेळी फक्त 42 टक्के लोकांनाच शौचालयाची सुविधा होती. पण आता हे प्रमाण 64 टक्क्यांवर आले आहे. सन 2019 मध्ये महात्मा गांधी यांच्या 150 व्या जयंतीला हे प्रमाण 100 टक्क्यांवर नेण्याचा सरकारचा मानस आहे, असे त्यांनी म्हटले आहे. अधिकार्‍यांना कोणते राज्य या कामात पिछाडीवर आहे आणि कोणते राज्य आघाडीवर आहे हे माहीत आहे. यासाठी अशी सक्षम यंत्रणा उभारण्यात आल्याचे सांगत गेट्स यांनी मोदींच्या कार्यशैलीचे कौतुक केले.

बिल गेट्स यांनी त्यांच्या ब्लॉगमध्ये ‘टॉकिंग टॉयलेट’ हा व्हिडिओदेखील शेयर केला आहे. यात सरकारी योजनेची माहिती देण्यात आली आहे. लोकांनी शौचालयाचा वापर करावा यासाठी सरकार आवाहन करत असून यात सरकार गूगलचीही मदत घेणार असल्याचे गेट्स यांनी सांगितले. मोदींनी या कामात जनजागृती मोहीम राबवण्यासाठी स्टार क्रिकेटर आणि आघाडीच्या सिनेकलावंतांचा खुबीने वापर केला, अशा शब्दांत त्यांनी मोदींचे कौतुक केले.